விஜய் அரசியல் பற்றி அருண் விஜய்.. ரெட்ட தலைக்கு கிடைத்த ப்ரோமோஷன்

நடிகர் அருண் விஜய் நடிப்பில் பெரும் எதிர்பார்ப்பை ஏற்படுத்தியுள்ள திரைப்படம் ‘ரெட்டை தல’. இதையொட்டி, படத்தின் வெற்றி வேண்டி நடிகர் அருண் விஜய் மற்றும் கதாநாயகி சித்தி இதானி ஆகியோர் சேலம் மாவட்டத்தில் மிகவும் புகழ்பெற்ற வெண்ணங்கொடி முனியப்பன் திருக்கோயிலுக்குச் சென்று சாமி தரிசனம் செய்தனர். இந்த ஆன்மீகப் பயணம் குறித்த புகைப்படங்கள் தற்போது இணையத்தில் வைரலாகி வருகின்றன.

கோவில் தரிசனத்திற்குப் பிறகு செய்தியாளர்களைச் சந்தித்த அருண் விஜய், தனது மகிழ்ச்சியைப் பகிர்ந்து கொண்டார். "ரெட்டை தல திரைப்படம் நாளை மறுநாள் ரிலீசாகிறது. இதற்காகவே சேலத்தில் உள்ள சக்திவாய்ந்த வெண்ணங்கொடி முனியப்பன் கோவிலுக்கு வந்து பிரார்த்தனை செய்தோம். நல்ல கதையம்சம் கொண்ட திரைப்படங்களுக்கு மக்கள் எப்போதும் ஆதரவு தருவார்கள் என்பதில் எனக்கு அசைக்க முடியாத நம்பிக்கை இருக்கிறது" என்று உற்சாகத்துடன் தெரிவித்தார்.

திரையரங்கு அனுபவம் குறித்துப் பேசிய அவர், மக்கள் இப்போதும் நல்ல படங்களைத் திரையரங்கிற்கு வந்து ரசிப்பதையே விரும்புகிறார்கள் என்றார். "ரசிகர்கள் தியேட்டருக்கு வரும் ஆர்வத்தை இன்னும் தக்க வைத்துக் கொள்ளும் வகையில், தரமான படங்களைக் கொடுக்க வேண்டிய பொறுப்பு திரையுலகினராகிய எங்களுக்கு இருக்கிறது" எனத் தனது பொறுப்புணர்வைக் வெளிப்படுத்தினார். திரையரங்குகளின் முக்கியத்துவத்தை அவர் இதன் மூலம் மீண்டும் வலியுறுத்தினார்.

சமீபகாலமாக விவாதப் பொருளாக இருக்கும் OTT வெளியீடு குறித்தும் தனது கருத்தைப் பதிவு செய்தார் அருண் விஜய். ஒரு புதிய திரைப்படம் தியேட்டரில் வெளியான பிறகு, எத்தனை நாட்கள் கழித்து ஓடிடியில் வர வேண்டும் என்பதைத் தயாரிப்பாளர்கள் சங்கமும், திரையரங்கு உரிமையாளர்களும் இணைந்து பேசி ஒரு சுமூகமான முடிவை எடுக்க வேண்டும் என்று அவர் கேட்டுக் கொண்டார். இது சினிமா தொழிலின் ஆரோக்கியத்திற்கு அவசியம் என்பது அவர் கருத்தாக உள்ளது.

அரசியல் குறித்தான கேள்விக்கு பதிலளித்த அருண் விஜய், தமிழக வெற்றிக் கழகத்தின் தலைவர் விஜய்யின் அரசியல் பயணம் குறித்துப் பேசினார். "விஜய்யின் அரசியல் வருகைக்குத் தமிழக மக்களிடையே அமோக வரவேற்பு கிடைத்து வருகிறது. அவரது புதிய பயணத்திற்கு என்னுடைய மனமார்ந்த வாழ்த்துகளைத் தெரிவித்துக் கொள்கிறேன்" என்றார். சக நடிகர் என்ற முறையில் விஜய்யின் இந்த அடுத்த கட்டத்திற்கு அவர் தனது ஆதரவை வெளிப்படுத்தினார்.

மேலும், "அரசியல் தளம் மட்டுமல்ல, எந்த ஒரு புதிய துறையில் அடியெடுத்து வைத்தாலும் ஆரம்பத்தில் அழுத்தம் இருக்கத்தான் செய்யும். அது இயல்பானதுதான்" என்று எதார்த்தமான கருத்தைக் கூறி தனது பேட்டியை நிறைவு செய்தார். ‘ரெட்டை தல’ திரைப்படத்திற்காக அவர் மேற்கொண்டு வரும் புரோமோஷன் பணிகள் ரசிகர்களிடையே படத்தைப் பார்க்கும் ஆர்வத்தை மேலும் தூண்டியுள்ளது.