பணப்பெட்டி மிஸ்ஸிங்.. வெறும் கையோடு வெளியேறிய சாண்ட்ராவின் சம்பளம்

பிக் பாஸ் தமிழ் சீசன் 9 தற்போது அதன் உச்சக்கட்டத்தை எட்டியுள்ளது. சுமார் 98 நாட்களைக் கடந்து விறுவிறுப்பாக நகர்ந்து கொண்டிருக்கும் இந்த சீசனின் கிராண்ட் ஃபினாலே இன்னும் சில நாட்களில் நடைபெற உள்ளது. இந்த முக்கியமான தருணத்தில், வைல்டு கார்டு என்ட்ரியாக நுழைந்து ரசிகர்களின் கவனத்தை ஈர்த்த சாண்ட்ரா எமி, குறைந்த வாக்குகளைப் பெற்று வீட்டை விட்டு வெளியேறியுள்ளார். அவர் பிக் பாஸ் வீட்டில் இருந்த நாட்கள் மற்றும் அவர் பெற்றுள்ள மொத்த ஊதியம் குறித்த தகவல்கள் தற்போது சமூக வலைதளங்களில் வைரலாகி வருகின்றன.

இந்த சீசனின் மிகப்பெரிய ஆச்சரியமே பிரஜன் மற்றும் சாண்ட்ரா தம்பதியினர் ஒன்றாக நுழைந்ததுதான். பிக் பாஸ் வரலாற்றிலேயே கணவன் - மனைவி இருவரும் ஒரே சீசனில் போட்டியாளர்களாகப் பங்கேற்பது இதுவே முதல்முறை. உள்ளே வந்த முதல் நாளிலேயே சாண்ட்ராவிற்கு 'சீக்ரெட் டாஸ்க்' வழங்கப்பட்டது. அதனை அவர் மிக லாவகமாகக் கையாண்டு சக போட்டியாளர்களைக் குழப்பியதுடன், ரசிகர்களிடம் "திறமையான போட்டியாளர்" என்ற நற்பெயரையும் பெற்றார். ஆரம்பத்தில் மிகவும் துடிப்பாக இருந்த அவர், விளையாட்டின் போக்கை மாற்றும் ஒரு முக்கிய சக்தியாகப் பார்க்கப்பட்டார்.

சாண்ட்ராவின் பயணம் அவ்வளவு எளிதாக இருக்கவில்லை. கனி மற்றும் பார்வதி ஆகியோருடன் ஏற்பட்ட மோதல்கள் அவரை ஒரு 'சண்டைக்காரர்' பிம்பத்திற்குள் தள்ளியது. குறிப்பாக, அவரது கணவர் பிரஜன் வீட்டை விட்டு வெளியேறிய பிறகு சாண்ட்ராவிடம் ஏற்பட்ட மாற்றங்கள் ரசிகர்களை அதிருப்தி அடையச் செய்தன. தனிமையில் அமர்ந்து அழுவது, மற்றவர்களுடன் சரியாக உரையாடாமல் இருப்பது போன்ற செயல்களால் அவர் மீது விமர்சனங்கள் எழுந்தன.

மிக முக்கியமாக, பிக் பாஸ் காரில் இருந்து விழுந்தபோது அவருக்கு ஏற்பட்ட 'பேனிக் அட்டாக்' (Panic Attack) குறித்து இணையத்தில் மிகப்பெரிய விவாதம் நடந்தது. அது ஒரு நாடகம் என்றும், சில நிமிடங்களிலேயே அவர் இயல்பு நிலைக்குத் திரும்பியது நடிப்பின் உச்சம் என்றும் ரசிகர்கள் விமர்சித்தனர். "நடிப்பு அரக்கி" என்று வசைபாடும் அளவிற்கு அவருக்கு எதிரான கருத்துக்கள் சமூக வலைதளங்களில் குவிந்தன.

வெளியில் இருந்த பிரஜன், தனது மனைவி சாண்ட்ரா குறித்து அவதூறு பரப்புபவர்கள் மீது சட்டப்படி நடவடிக்கை எடுப்பேன் என்று எச்சரித்திருந்தார். குறிப்பாக கம்ருதீன் போன்ற விமர்சகர்களுக்கு எதிராக அவர் அளித்த ஆவேசமான பேட்டி, சாண்ட்ராவிற்கு சாதகமாக அமைவதற்குப் பதிலாகப் பாதகமாக முடிந்துவிட்டது. பிரஜனின் இந்த அணுகுமுறை ரசிகர்களிடையே எரிச்சலை ஏற்படுத்தியதே சாண்ட்ராவின் வெளியேற்றத்திற்கு ஒரு முக்கிய காரணமாகக் கருதப்படுகிறது.

பிக் பாஸ் வீட்டில் சுமார் 70 நாட்கள் வரை நீடித்த சாண்ட்ராவிற்கு வழங்கப்பட்ட சம்பளம் குறித்த தகவல் தற்போது கசிந்துள்ளது. அவருக்கு நாள் ஒன்றுக்கு 25,000 முதல் 30,000 ரூபாய் வரை சம்பளம் பேசப்பட்டதாகக் கூறப்படுகிறது.70 நாட்கள் கணக்கின்படி பார்த்தால், அவர் சுமார் 17 லட்சம் முதல் 21 லட்சம் ரூபாய் வரை மொத்த ஊதியமாகப் பெறுவார் என எதிர்பார்க்கப்படுகிறது.

கடைசி நேரத்தில் பிக் பாஸ் வழங்கிய 'பணப்பெட்டி' டாஸ்க்கில் சாண்ட்ரா எப்படியும் அந்தப் பணத்துடன் வெளியேறுவார் என்று கணிக்கப்பட்டது. பிரஜன் மீண்டும் வீட்டிற்குள் வந்து தன்னை அழைத்துச் செல்வார், அப்போது பணப்பெட்டியை எடுத்துக் கொள்ளலாம் என்று அவர் திட்டமிட்டிருந்ததாகத் தெரிகிறது. ஆனால், யாரும் எதிர்பார்க்காத வகையில் கானா வினோத் பணப்பெட்டியை எடுத்துக்கொண்டு வெளியேறினார். இதனால் சாண்ட்ரா வெறும் சம்பளத்துடன் மட்டுமே வீட்டை விட்டு வெளியேற வேண்டிய சூழல் ஏற்பட்டது.

இறுதிப்போட்டிக்குத் தகுதி பெறுவார் என்று எதிர்பார்க்கப்பட்ட சாண்ட்ரா, பலத்த சர்ச்சைகளுக்கு மத்தியில் விடைபெற்றுள்ளார். இது அவரது கேரியரில் அடுத்தகட்டத்திற்குச் செல்ல உதவுமா அல்லது இந்த எதிர்மறை விமர்சனங்கள் முட்டுக்கட்டையாக இருக்குமா என்பதைப் பொறுத்திருந்துதான் பார்க்க வேண்டும்.