தனுஷைத் தொடர்ந்து செல்வராகவனும் அதே முடிவா? அதிர்ச்சி தந்த கீதாஞ்சலியின் செயல்!

தமிழ் சினிமாவின் முன்னணி இயக்குநர்களில் ஒருவரான செல்வராகவனின் தனிப்பட்ட வாழ்க்கை சமீப காலமாகவே ஊடகங்களின் பேசுபொருளாகி வருகிறது. இவரும், இவரது இரண்டாவது மனைவி கீதாஞ்சலி செல்வராகவனும் பிரிந்து செல்லவிருப்பதாகக் கடந்த சில மாதங்களாகவே திரை வட்டாரத்தில் கிசுகிசுக்கள் பரவி வந்தன.

ஆடை வடிவமைப்பாளரும், இயக்குநருமான கீதாஞ்சலியை செல்வராகவன் கடந்த 2011ஆம் ஆண்டு காதலித்து கரம் பிடித்தார். இந்தத் தம்பதியருக்கு மூன்று அழகான குழந்தைகள் உள்ளனர். செல்வராகவன் இயக்கிய 'மயக்கம் என்ன' (2011) படத்தில் உதவி இயக்குநராகப் பணியாற்றியபோதுதான் இருவருக்கும் காதல் மலர்ந்தது குறிப்பிடத்தக்கது.

சமீபகாலமாக இருவரும் பொது நிகழ்வுகளில் ஒன்றாகக் கலந்துகொள்வதைத் தவிர்ப்பது, மற்றும் சமூக வலைதளப் பதிவுகளில் ஒருவருக்கொருவர் குறிக்காமல்  இருப்பதைக் கவனித்த ரசிகர்கள் இந்த வதந்திகளைப் பரப்பத் தொடங்கினர். இந்நிலையில், இந்த வதந்திகளுக்கு நெருப்பு மூட்டும் விதமாக, கீதாஞ்சலி செல்வராகவன் தனது அதிகாரப்பூர்வ இன்ஸ்டாகிராம் பக்கத்தில் இருந்து கணவர் செல்வராகவனுடன் இருந்த பெரும்பாலான தனிப்பட்ட புகைப்படங்கள் மற்றும் வீடியோக்களை நீக்கியுள்ளார்.  தற்போது ஒரே ஒரு திருமணப் புகைப்படம் மட்டுமே அவரது பக்கத்தில் இருப்பது ரசிகர்கள் மத்தியில் பெரும் அதிர்ச்சியை ஏற்படுத்தியுள்ளது.

செல்வராகவனுக்கு இது இரண்டாவது திருமணம் ஆகும். இதற்கு முன்னர் அவர் நடிகை சோனியா அகர்வாலை  திருமணம் செய்திருந்தார். செல்வராகவனின் சினிமா வாழ்க்கையில் திருப்புமுனையாக அமைந்த 'காதல் கொண்டேன்' மற்றும் அவரது கிளாசிக் படைப்பான '7ஜி ரெயின்போ காலனி'  ஆகிய படங்களில் இருவரும் இணைந்து பணியாற்றியபோது ஏற்பட்ட நட்பு காதலாக மாறியது.

பின்னர் இருவரும் 2006ஆம் ஆண்டு திருமணம் செய்துகொண்டனர். இருப்பினும், கருத்து வேறுபாடுகள் காரணமாக நான்கு வருடங்கள் மட்டுமே நீடித்த இவர்களது திருமண வாழ்க்கை, 2010ஆம் ஆண்டு விவாகரத்தில் முடிந்தது. இந்த முறிவு திரையுலகில் பெரும் பரபரப்பை ஏற்படுத்தியது.

கீதாஞ்சலி செல்வராகவன் தனது இன்ஸ்டாகிராம் பக்கத்தில் புகைப்படங்களை நீக்கியிருந்தாலும், இயக்குநர் செல்வராகவன் தனது இன்ஸ்டாகிராம் மற்றும் ட்விட்டர் போன்ற சமூக ஊடகப் பக்கங்களில் கீதாஞ்சலி உடனான புகைப்படங்கள், குழந்தைகளின் புகைப்படங்கள் மற்றும் வீடியோக்கள் ஆகியவற்றை நீக்காமல் அப்படியே வைத்துள்ளார்.

மேலும், சமீபத்திய அவரது பதிவுகள் எதிலும் விவாகரத்து பற்றியோ, அல்லது தனிப்பட்ட வாழ்க்கை பற்றியோ எந்தவிதக் குறிப்பும் இல்லை. இதுவே ரசிகர்கள் மத்தியில் இந்தக் கிசுகிசுக்கள் உண்மையா அல்லது வெறும் வதந்தியா என்ற குழப்பத்தை ஏற்படுத்தியுள்ளது. கீதாஞ்சலி தரப்பில் இருந்து அதிகாரப்பூர்வ அறிவிப்பு எதுவும் வெளியாகாத நிலையில், இந்த வதந்தியின் உண்மைத்தன்மை விரைவில் தெரியவரும் என்று எதிர்பார்க்கப்படுகிறது.