ஜனவரி 30 தியேட்டரில் மோதும் 4 படங்கள்.. லிஸ்ட் இதோ!
ஜனவரி மாதத்தின் இறுதி வாரமான இந்த வெள்ளிக்கிழமை (ஜனவரி 30, 2026) தமிழ் சினிமா ரசிகர்களுக்கு ஒரு செம விருந்தாக அமையப்போகிறது. ஆக்ஷன், த்ரில்லர், ஹாரர் மற்றும் ஒரு வித்தியாசமான ஊமைப் படம் என நான்கு மாறுபட்ட திரைப்படங்கள் திரையரங்குகளை அலங்கரிக்கக் காத்திருக்கின்றன.
ஒரே நாளில் பல படங்கள் வெளியானாலும், ஒவ்வொன்றும் ஒரு தனித்துவமான பாணியைக் கொண்டுள்ளன. குறிப்பாக ‘லப்பர் பந்து’ வெற்றிக்குப் பிறகு அட்டகத்தி தினேஷ் நடித்துள்ள படம் மற்றும் விஜய் சேதுபதியின் ‘காந்தி டாக்ஸ்’ ஆகியவை மீதான எதிர்பார்ப்பு எகிறியுள்ளது.
1. கருப்பு பல்சர் (Karuppu Pulsar)
‘லப்பர் பந்து’ படத்தின் மாபெரும் வெற்றிக்குப் பிறகு, அட்டகத்தி தினேஷ் கதையின் நாயகனாக நடித்திருக்கும் திரைப்படம் 'கருப்பு பல்சர்'. முரளி கிருஷ் இயக்கத்தில் உருவாகியுள்ள இந்தப் படத்தில் தினேஷ் ஒரு ஸ்போர்ட்ஸ் பைக்கராக நடித்திருக்கிறார். ஒரு மனிதனுக்கும் அவனது மோட்டார் சைக்கிளுக்கும் இடையிலான உணர்ச்சிகரமான பிணைப்பை மையமாக வைத்து இந்தப் படம் உருவாகியுள்ளது.
வேகம், போட்டி மற்றும் வாழ்க்கையின் சவால்களைச் சுற்றி நகரும் இந்த கிராமப்புற பின்னணியிலான த்ரில்லரில், தினேஷுடன் இணைந்து நடிகர் கலையரசன் மற்றும் மன்சூர் அலிகான் ஆகியோர் முக்கிய கதாபாத்திரங்களில் நடித்துள்ளனர். தினேஷின் எதார்த்தமான நடிப்பு இப்படத்திற்குப் பலம் சேர்க்கும் என எதிர்பார்க்கப்படுகிறது.
2. காந்தி டாக்ஸ் (Gandhi Talks)
இந்த வாரத்தின் மிகவும் வித்யாசமான முயற்சி என்றால் அது விஜய் சேதுபதியின் 'காந்தி டாக்ஸ்' தான். நவீன காலத்தில் வெளியாகும் ஒரு முழுநீள ஊமைப் படம் (Silent Film) இது. கிஷோர் பெலேகர் இயக்கத்தில் உருவாகியுள்ள இந்தப் படத்தில் விஜய் சேதுபதியுடன் அரவிந்த் சாமி, அதிதி ராவ் ஹைதரி மற்றும் சித்தார்த் ஜாதவ் ஆகியோர் நடித்துள்ளனர்.
மகாத்மா காந்தியின் நினைவு நாளான ஜனவரி 30 அன்று இப்படம் வெளியாகிறது. பணம் மற்றும் பேராசை மனித வாழ்க்கையை எப்படி மாற்றுகிறது என்பதை ஒரு டார்க் காமெடியாக (Black Comedy) இப்படம் விவரிக்கிறது. ஆஸ்கார் நாயகன் ஏ.ஆர். ரஹ்மானின் பின்னணி இசைதான் இந்தப் படத்தில் பேசும் வசனங்களாக இருக்கும் என்பது குறிப்பிடத்தக்கது.
3. கிரானி (Granny)
பேய் படங்களை ரசிக்கும் ரசிகர்களுக்காக தயாராகியுள்ளது 'கிரானி'. பழம்பெரும் நடிகை வடிவுக்கரசி இதில் ஒரு மிரட்டலான பேய் வேடத்தில் நடித்துள்ளார். பொதுவாக குணச்சித்திர வேடங்களில் நாம் பார்த்த வடிவுக்கரசியை, கையில் விளக்குடன் நரைத்த முடியுடன் ஒரு திகில் அவதாரத்தில் காண்பது ரசிகர்களுக்குப் புதிய அனுபவமாக இருக்கும். விஜயகுமாரா இயக்கத்தில் உருவாகியுள்ள இப்படத்தில் சிங்கம்புலி மற்றும் திலீபன் ஆகியோர் நடித்துள்ளனர்.
4. லாக்டவுன் (Lockdown)
நடிகை அனுபாமா பரமேஸ்வரன் முதன்மை கதாபாத்திரத்தில் நடித்துள்ள படம் 'லாக்டவுன்'. ஏ.ஆர். ஜீவா இயக்கத்தில் லைகா புரொடக்ஷன்ஸ் தயாரித்துள்ள இந்தப் படம், எதிர்பாராத நெருக்கடி காலத்தில் ஒரு பெண் வீட்டுக்குள்ளேயே தனிமைப்படுத்தப்படும்போது சந்திக்கும் சவால்களைப் பேசுகிறது. சார்லி மற்றும் நிரோஷா ஆகியோர் முக்கிய கதாபாத்திரங்களில் நடித்துள்ளனர். ஏற்கனவே பலமுறை ரிலீஸ் தள்ளிப்போன இந்தப் படம், இறுதியாக இந்த வாரம் திரைக்கு வருகிறது.
