அஜித்தின் பாணியில் அட்வைஸ் செய்த கவின்.. கடமை முக்கியம், சினிமா பொழுதுபோக்கு!

வெற்றிமாறன் மற்றும் ஆண்ட்ரியா ஆகியோர் இணைந்து தயாரித்திருக்கும் 'மாஸ்க்' திரைப்படம் நாளை (வெள்ளிக்கிழமை) உலகம் முழுவதும் திரையரங்குகளில் வெளியாகிறது. இதில் கவின் மற்றும் ஆண்ட்ரியா ஆகியோர் லீட் ரோலில் நடித்திருக்கிறார்கள்.

'மாஸ்க்' படத்திற்கான ப்ரோமோஷன் நிகழ்வுகள் தீவிரமாக நடைபெற்று வரும் நிலையில், சமீபத்தில் ஒரு கல்லூரி வளாகத்தில் நடந்த பிரமோஷன் நிகழ்வில் நடிகர் கவின் மாணவர்களின் மத்தியில் பேசியதுதான் இப்போது சமூக வலைதளங்களில் பரபரப்பாகப் பேசப்பட்டு வருகிறது.

கல்லூரி மாணவர்கள் மத்தியில் பேசிய கவின், "மாஸ்க் திரைப்படம் வெள்ளிக்கிழமை ரிலீஸாகிறது. அன்றைய தினம் எல்லோருக்கும் கல்லூரி இருக்கும். நீங்கள் எல்லாம் சமத்தாக அன்றைய தினம் கல்லூரிக்கு வந்து உங்கள் கடமையை முடிக்க வேண்டும்.

பிறகு சனிக்கிழமையோ, ஞாயிற்றுக்கிழமையோ தியேட்டருக்கு வந்து படம் பாருங்கள். அதுவே போதும். ஒன்றும் பிரச்னையில்லை. சினிமா ஒரு பொழுதுபோக்கு. தேவையானபோது வாருங்கள். முடிந்ததும் வெளியே போய்விடுங்கள்" என்று மிகவும் பொறுப்பான ஒரு அட்வைஸைக் கொடுத்தார்.

ஒரு நடிகர் தனது படத்தின் முதல் நாள் வசூலை பாதிக்கக்கூடிய ஒரு அறிவுரையை, மாணவர்களின் எதிர்காலத்தை மனதில் கொண்டு அளித்திருப்பது, உண்மையிலேயே பாராட்டத்தக்க ஒரு விஷயம்.

நடிகர் கவின் இவ்வாறு அறிவுரை வழங்கியதை, தமிழ் சினிமாவின் முன்னணி நட்சத்திரங்களில் ஒருவரான அஜித்குமாரின் அணுகுமுறையுடன் ஒப்பிட்டுப் பேசுகிறார்கள் ரசிகர்கள். அஜித்குமார் பல சமயங்களில், "சினிமா என்பது ஒரு பொழுதுபோக்கு மட்டுமே. அதையும் தாண்டி, நீங்கள் உங்கள் குடும்பம், தொழில், கல்வி ஆகியவற்றில் கவனம் செலுத்துங்கள்," என்று ரசிகர்கள் மற்றும் பொதுமக்களுக்கு தொடர்ந்து அறிவுறுத்தி வருபவர்.

தனது பட வெளியீட்டின்போது கூட ரசிகர்களை வரவழைக்க வேண்டும் என்று எந்தவொரு கட்டாயத்தையும் அவர் ஏற்படுத்தியதில்லை. அதே பாணியை இப்போது இளம் நடிகரான கவினும் பின்பற்றி இருக்கிறார்.

ஒரு பெரிய நடிகராக இருந்தாலும், சினிமாவையும் நிஜ வாழ்க்கையையும் பிரித்து அணுகும் இந்த நேர்மையான அணுகுமுறை, மாணவர்களின் வாழ்க்கையில் ஒரு நேர்மறையான தாக்கத்தை ஏற்படுத்தும்

கவின், 'மாஸ்க்' திரைப்படத்தின் ப்ரோமோஷன் மேடையில் மாணவர்களுக்கு வழங்கிய இந்த அறிவுரை, ஒரு சாதாரண நடிகரின் பேச்சாக இல்லாமல், ஒரு சமூக வழிகாட்டியின் குரலாக ஒலித்துள்ளது. சினிமா ஒரு பொழுதுபோக்கு மட்டுமே என்றும், கல்வி மற்றும் கடமைதான் ஒரு மாணவரின் முதல் நோக்கம் என்பதையும் அவர் ஆணித்தரமாக உணர்த்தியுள்ளார்.