விடைபெற்றார் நகைச்சுவை மன்னன் ஸ்ரீனிவாசன்.. மலையாளத் திரையுலகின் ஈடுசெய்ய முடியாத இழப்பு!

மலையாளத் திரையுலகின் ஜாம்பவான், மூத்த நடிகரும், புகழ்பெற்ற திரைக்கதை ஆசிரியருமான ஸ்ரீனிவாசன் (69) உடல்நலக் குறைவால் காலமானார். அவரது மறைவு தென்னிந்தியத் திரையுலகினரிடையே பெரும் சோகத்தை ஏற்படுத்தியுள்ளது.

கடந்த சில ஆண்டுகளாகவே வயது முதிர்வு மற்றும் சிறுநீரகக் கோளாறு காரணமாக ஸ்ரீனிவாசன் அவதிப்பட்டு வந்தார். இன்று காலை டயாலிசிஸ் சிகிச்சைக்காக வீட்டிலிருந்து மருத்துவமனைக்கு அழைத்துச் செல்லப்பட்டார். திருப்பூணித்துறை அருகே சென்றபோது, அவரது உடல்நிலை திடீரென மோசமடைந்தது. உடனடியாக அருகில் உள்ள தாலுகா மருத்துவமனைக்கு அழைத்துச் செல்லப்பட்டும், சிகிச்சை பலனின்றி அவரது உயிர் பிரிந்தது. 

ஸ்ரீனிவாசன் வெறும் நடிகர் மட்டுமல்ல; அவர் ஒரு மிகச்சிறந்த திரைக்கதை ஆசிரியர் மற்றும் இயக்குநர். மலையாளத் திரையுலகில் சமூக நையாண்டி (Social Satire) திரைப்படங்களுக்குப் புத்துயிர் ஊட்டியவர் இவரே.

மோகன்லால் - ஸ்ரீனிவாசன் கூட்டணி இணைந்து நடித்த திரைப்படங்கள் இன்றும் ரசிகர்களின் 'ஆல் டைம் ஃபேவரைட்'. இவருடைய மகன்கள் வினீத் ஸ்ரீனிவாசன் மற்றும் தியான் ஸ்ரீனிவாசன் ஆகியோரும் இன்று மலையாளத் திரையுலகில் முன்னணி நட்சத்திரங்களாக ஜொலித்து வருகின்றனர்.

மலையாளத்தில் பிஸியாக இருந்தாலும், தமிழ் ரசிகர்கள் மனதிலும் அவர் இடம் பிடித்தார். பிரியதர்ஷன் இயக்கத்தில் ஷாம் நடித்த லேசா லேசா படத்தில், ஒரு முக்கியமான குணச்சித்திர கதாபாத்திரத்தில் நடித்துத் தன் முத்திரையைப் பதித்தார். புள்ளகுட்டிக்காரன் படத்திலும் இவரது எதார்த்தமான நடிப்பு வெகுவாகக் கவரப்பட்டது. இவை தவிர, இவரது பல மலையாளத் திரைப்படங்கள் தமிழில் ரீமேக் செய்யப்பட்டு பெரும் வெற்றி பெற்றுள்ளன என்பது குறிப்பிடத்தக்கது.

ஸ்ரீனிவாசனின் மறைவுக்கு மம்மூட்டி, மோகன்லால் உள்ளிட்ட மலையாள முன்னணி நடிகர்களும், தமிழ் மற்றும் தெலுங்கு திரையுலகினரும் ஆழ்ந்த இரங்கல்களைத் தெரிவித்து வருகின்றனர். எதார்த்தமான வசனங்கள் மற்றும் எளிமையான நடிப்பால் பல தசாப்தங்களாக மக்களை மகிழ்வித்த ஒரு கலை சகாப்தம் இன்று முடிவுக்கு வந்துள்ளது.