அஜித்தின் விநாயக் மகாதேவ் இஸ் பேக்.. தியேட்டர்களை தெறிக்கவிடத் தயாராகும் மங்காத்தா!

வெங்கட் பிரபு இயக்கத்தில்,அஜித்தின் 50-வது படமாக வெளியாகி பாக்ஸ் ஆபீஸில் சுனாமி ஏற்படுத்திய திரைப்படம் 'மங்காத்தா'. 2011ல் வெளியான இப்படம், அதுவரை தமிழ் சினிமா பார்த்திராத ஒரு 'ஆன்டி-ஹீரோ' பிம்பத்தை அஜித்திற்கு கொடுத்தது. தற்போது 14 ஆண்டுகளுக்குப் பிறகு, இந்தப் படத்தை மீண்டும் பெரிய திரையில் காண ரசிகர்கள் ஆவலுடன் காத்திருந்த நிலையில், சன் பிக்சர்ஸ் நிறுவனம் வருகிற ஜனவரி 23-ம் தேதி இப்படம் ரீ-ரிலீஸ் செய்யப்படும் என அதிகாரப்பூர்வமாக அறிவித்துள்ளது.

இப்படத்தில் இன்ஸ்பெக்டர் விநாயக் மகாதேவ் என்ற கதாபாத்திரத்தில் அஜித் நடித்திருப்பார். "Money, Money, Money" என பணத்திற்காக எதையும் செய்யும் ஒரு நெகட்டிவ் கதாபாத்திரத்தை அஜித் கையாண்ட விதம் மெய்சிலிர்க்க வைத்தது.

குறிப்பாக, அவரது 'சால்ட் அண்ட் பெப்பர்' லுக் மற்றும் மேனரிசங்கள் அன்றைய இளைஞர்களிடையே மிகப்பெரிய டிரெண்டாக மாறியது. 500 கோடி ரூபாய் பணத்தை கொள்ளையடிக்கும் திட்டமும், அதில் வரும் திருப்பங்களும் இப்படத்தின் வெற்றிக்கு முக்கிய காரணங்களாக அமைந்தன.

மங்காத்தா படத்தின் முதுகெலும்பாக அமைந்தது யுவன் சங்கர் ராஜாவின் இசை. இப்படத்தின் பின்னணி இசை (BGM) இன்றளவும் பலரது ரிங்டோனாக ஒலித்துக் கொண்டிருக்கிறது.

அஜித்துடன் இணைந்து ஆக்‌ஷன் கிங் அர்ஜுன், திரிஷா, அஞ்சலி மற்றும் பலர் நடித்திருந்தனர். குறிப்பாக, அஜித் ஒரு சக்கரத்தில் பைக் ஓட்டும் (Wheelie) ஸ்டண்ட் காட்சிகள் திரையரங்குகளை அதிர வைத்தன.

சமீபகாலமாக தமிழ் சினிமாவில் பழைய ஹிட் படங்கள் மீண்டும் வெளியாகி நல்ல வசூலைப் பெற்று வருகின்றன. அண்மையில் அஜித்தின் 'அட்டகாசம்' படம் வெளியானது.

அதனைத் தொடர்ந்து ஜனவரி 23-ல் 'மங்காத்தா' மற்றும் பிப்ரவரி மாதத்தில் 'அமர்க்களம்' என அடுத்தடுத்து அஜித்தின் பிளாக்பஸ்டர் படங்கள் ரீ-ரிலீஸ் ஆக உள்ளதால் அஜித் ரசிகர்கள் மிகுந்த உற்சாகத்தில் உள்ளனர். சமூக வலைதளங்களில் மங்காத்தா தொடர்பான ஹேஷ்டேக்குகள் இப்போதே வைரலாகத் தொடங்கிவிட்டன.