இந்தி எதிர்ப்பு போராட்டம்.. சுதா கொங்கராவின் பராசக்தி சொல்லும் உண்மை என்ன?

தமிழ் திரையுலகில் இந்த ஆண்டின் மிகவும் எதிர்பார்க்கப்பட்ட திரைப்படங்களில் ஒன்றாக பராசக்தி உருவெடுத்துள்ளது. முதலில் பொங்கல் பண்டிகையை முன்னிட்டு ஜனவரி 14-ம் தேதி வெளியாகும் என்று அறிவிக்கப்பட்டிருந்த நிலையில், தற்போது ரசிகர்களுக்கு இன்ப அதிர்ச்சி கொடுக்கும் வகையில் நான்கு நாட்களுக்கு முன்னதாகவே, அதாவது ஜனவரி 10-ம் தேதியே திரையரங்குகளில் வெளியாக உள்ளது.

இந்தத் தேதிய மாற்றம் சினிமா வட்டாரத்தில் பெரும் பரபரப்பை ஏற்படுத்தியுள்ளது. இதற்கு முக்கிய காரணம், தளபதி விஜய்யின் கடைசி படமாக கருதப்படும் ஜனநாயகன் படமும் இதே காலக்கட்டத்தில் வெளியாகிறது. இரண்டு மிகப்பெரிய நட்சத்திரங்களின் படங்கள் நேருக்கு நேர் மோதுவதால், பாக்ஸ் ஆபீஸ் வசூலில் யார் முந்துவார்கள் என்ற பதற்றம் திரையரங்கு உரிமையாளர்கள் மற்றும் ரசிகர்களிடையே அதிகரித்துள்ளது. இருப்பினும், சிவகார்த்திகேயனின் வளர்ந்து வரும் மார்க்கெட் மற்றும் சுதா கொங்கராவின் எதார்த்தமான மேக்கிங் ஆகியவை இந்தப் படத்திற்கு ஒரு தனி பலத்தை கொடுத்துள்ளது.

இயக்குநர் சுதா கொங்கரா எப்போதும் நிஜ வாழ்க்கை சம்பவங்களை அல்லது ஒரு குறிப்பிட்ட காலக்கட்டத்தை மையமாக வைத்து படம் எடுப்பதில் வல்லவர். அந்த வகையில் பராசக்தி படம் 1965-ஆம் ஆண்டு தமிழ்நாட்டில் நடந்த வரலாற்றுச் சிறப்புமிக்க சம்பவங்களை மையமாக வைத்து உருவாகியுள்ளது. குறிப்பாக, அப்போது பெரும் அதிர்வலைகளை ஏற்படுத்திய 'இந்தி எதிர்ப்பு போராட்டம்' மற்றும் மத்திய அரசின் சில சட்ட திட்டங்களுக்கு எதிராக தமிழக மக்கள் எவ்வாறு கிளர்ந்தெழுந்தனர் என்பதை இந்தப் படம் பேசுகிறது.

படத்தில் சிவகார்த்திகேயன் மற்றும் அதர்வா ஆகிய இருவரும் சகோதரர்களாக நடித்துள்ளனர். ஆனால் இவர்களது கதாபாத்திரங்கள் நேர் எதிரான சித்தாந்தங்களைக் கொண்டவை. அதர்வா, மத்திய அரசின் விதிகளையும் சட்டங்களையும் துணிச்சலுடன் கேள்வி கேட்கும் ஒரு புரட்சிகரமான இளைஞனாக நடித்துள்ளார். மறுபுறம், சிவகார்த்திகேயன் ரயில்வே துறையில் பணியாற்றும் ஒரு அரசு ஊழியராக, சட்டத்திற்கும் குடும்பத்திற்கும் இடையே போராடும் ஒரு முதிர்ச்சியான கதாபாத்திரத்தை ஏற்றுள்ளார். ஒரே குடும்பத்தில் இருக்கும் இரண்டு சகோதரர்களுக்குள் அரசியல் எப்படி நுழைகிறது, அது அவர்களின் உறவை எப்படி பாதிக்கிறது என்பதை மிகவும் ஆழமாகப் பதிவு செய்திருக்கிறார் சுதா கொங்கரா.

சிவகார்த்திகேயன் மற்றும் அதர்வா தவிர, இந்தப் படத்தில் மூத்த நடிகர் ரவி மோகன் ஒரு கண்டிப்பான அரசு அதிகாரியாக முக்கிய வேடத்தில் நடித்துள்ளார். அவரது கதாபாத்திரம் கதையில் வரும் அரசியல் நெருக்கடிகளை நகர்த்தும் ஒரு முக்கிய புள்ளியாக அமையும் என எதிர்பார்க்கப்படுகிறது.

சுதா கொங்கராவின் முந்தைய படங்களான 'இறுதிச்சுற்று' மற்றும் 'சூரரைப் போற்று' போன்று, இந்தப் படத்திலும் உணர்ச்சிகரமான காட்சிகள் மற்றும் அழுத்தமான வசனங்களுக்கு பஞ்சம் இருக்காது. ஜி.வி. பிரகாஷ் குமாரின் இசைபடத்திற்கு மிகப்பெரிய பலமாக இருக்கும் என நம்பப்படுகிறது. 1960-களின் சென்னையை தத்ரூபமாக திரையில் கொண்டு வர கலை இயக்குநர் மற்றும் ஒளிப்பதிவாளர் குழு கடுமையாக உழைத்துள்ளது.

படம் வெளியாவதற்கு இன்னும் சில நாட்களே உள்ள நிலையில், சென்சார் சான்றிதழ் தொடர்பான சில செய்திகள் வெளியாகியுள்ளன. படத்திற்கு U/A சான்றிதழ் கிடைத்துள்ளதாகக் கூறப்பட்டாலும், இறுதிச் சென்சார் செயல்முறைகள் இன்னும் முழுமையாக நிறைவடையவில்லை என்று தெரிகிறது. அரசியல் ரீதியான சில வசனங்கள் அல்லது போராட்டக் காட்சிகள் காரணமாக இந்தத் தாமதம் ஏற்பட்டிருக்கலாம் என கோலிவுட் வட்டாரத்தில் கிசுகிசுக்கப்படுகிறது.

இந்தச் சென்சார் தாமதம் காரணமாக, பல திரையரங்குகளில் இன்னும் முன்பதிவு தொடங்கப்படவில்லை. இது ரசிகர்களிடையே ஒருவித ஏமாற்றத்தை ஏற்படுத்தினாலும், கடைசி நேரத்தில் டிக்கெட்டுகளுக்கான டிமாண்ட் பலமடங்கு உயரும் என எதிர்பார்க்கப்படுகிறது. திரையரங்கு உரிமையாளர்கள் ஜனவரி 8 அல்லது 9-ம் தேதிகளில் முழுமையான முன்பதிவு தொடங்கும் என நம்பிக்கை தெரிவித்துள்ளனர்.

திரையரங்குகளில் வெளியாவதற்கு முன்பே இந்தப் படத்தின் டிஜிட்டல் உரிமம் பெரும் விலைக்கு விற்பனையாகியுள்ளது. 'பராசக்தி' படத்தின் டிஜிட்டல் உரிமையை ZEE5 நிறுவனம் கைப்பற்றியுள்ளது. வழக்கமாக ஒரு படம் திரையரங்கில் வெளியான 4 முதல் 6 வாரங்களுக்குப் பிறகு ஓடிடியில் வெளியாகும். அந்த வகையில் பிப்ரவரி இறுதி அல்லது மார்ச் தொடக்கத்தில் இந்தப் படத்தை நாம் வீட்டிலிருந்தே பார்க்கலாம். இருப்பினும், தயாரிப்பு தரப்பில் இருந்து அதிகாரப்பூர்வ ஓடிடி ரிலீஸ் தேதி இன்னும் அறிவிக்கப்படவில்லை.