வலது கை கொடுப்பது இடது கைக்குத் தெரியாது.. சூப்பர் ஸ்டாரின் 40 ஆண்டுக்கால சமூகப் பணி!

தமிழகத் திரைத்துறையில் ‘சூப்பர் ஸ்டார்’ என்ற சிம்மாசனத்தில் அமர்ந்திருக்கும் ரஜினிகாந்த், தனது ஸ்டைலால் மட்டுமல்லாமல், தனது மனிதாபிமானத்தாலும் கோடிக்கணக்கான மக்களின் இதயங்களை வென்றுள்ளார். திரைவாழ்வில் அவர் எட்டிய உச்சங்களை உலகம் அறியும், ஆனால் அவர் செய்த சமூகப் பங்களிப்புகள் பல நேரங்களில் விளம்பர வெளிச்சமின்றி மறைந்தே கிடக்கின்றன.

தமிழர்களின் நலன் சார்ந்த பிரச்சினைகளில் ரஜினிகாந்த் எப்போதும் தயங்கியதில்லை. 1984-ஆம் ஆண்டிலேயே இலங்கைத் தமிழர் விவகாரத்தில் இலங்கை அரசைக் கண்டித்து முதல் ஆளாகக் குரல் கொடுத்தார். அதேபோல், 1991-ல் காவிரி நீர் விவகாரத்தில் கர்நாடக அரசுக்கு எதிராக உண்ணாவிரதம் இருந்து, தமிழகத்தின் உரிமையை நிலைநாட்டத் துணிச்சலாக நின்றார்.

தமிழகம் சந்தித்த இயற்கைச் சீற்றங்களின் போது ரஜினியின் கரங்கள் தாராளமாக நீண்டிருக்கின்றன. 2004 சுனாமி பேரழிவின் போது ₹21 லட்சம் நிதியுதவி வழங்கியது முதல், 2015 சென்னை வெள்ளத்தின் போது பாதிக்கப்பட்ட மக்களுக்காகவும், தூய்மைப் பணியாளர்களுக்காகவும் தனது ராகவேந்திரா மண்டபத்தைத் திறந்துவிட்டு உணவு மற்றும் தங்குமிடம் வழங்கியது வரை அவரது சேவை மகத்தானது. குறிப்பாக, கஜா புயல் பாதிப்பின் போது பாதிக்கப்பட்ட 10 குடும்பங்களுக்குப் புதிய வீடுகளைத் தன் சொந்தச் செலவில் கட்டிக் கொடுத்தது அவர் ஒரு ‘மக்கள் மனிதன்’ என்பதை நிரூபித்தது.

திருவண்ணாமலை அண்ணாமலையார் கோவிலின் கிரிவலப் பாதையில் ₹10 லட்சம் செலவில் மின்விளக்கு வசதிகளைச் செய்து கொடுத்து பக்தர்களின் பாதுகாப்பை உறுதி செய்தார். மேலும், ஏழை எளிய மக்களின் திருமணங்களைச் சொந்தச் செலவில் நடத்தி வைப்பது, விழித்தெழும் தமிழகத்திற்காகக் கண் தானம் செய்ய முதன்முதலில் முன்வந்தது என அவரது நீண்ட காலச் சமூகப் பணிகள் ஏராளம்.

ரஜினிகாந்த் அவர்களின் மிக உன்னதமான செயல் என்றால், அது 1999-ல் அவர் எடுத்த முடிவுதான். தனது மறைவிற்குப் பிறகு, தனது ராகவேந்திரா திருமண மண்டபத்தின் மூலம் வரும் வருமானம் முழுவதும் தனது குடும்பத்திற்குப் போகாமல், முழுக்க முழுக்க மக்கள் நலப்பணிகளுக்கே செல்ல வேண்டும் என அவர் உயில் எழுதி வைத்துள்ளார். உழைத்துச் சேர்த்த சொத்துக்களை மக்களுக்கே திரும்பக் கொடுக்கும் இத்தகைய குணம் கொண்ட ஆளுமைகள் மிக அரிது.

1996 தமிழகச் சட்டமன்றத் தேர்தலின் போது அவர் எடுத்த அரசியல் நிலைப்பாடு, தமிழக வரலாற்றையே மாற்றியமைத்தது. ஒரு தனி மனிதனாக நின்று ஒரு ஆட்சியையே மாற்றும் வல்லமை அவருக்கு இருந்தும், அதிகாரத்தின் மீது ஆசைப்படாமல் ஒதுங்கி நின்றது அவரது முதிர்ச்சியைக் காட்டுகிறது. இன்றும் விளம்பரப் படங்களில் நடிக்காமல் தனது கொள்கையில் உறுதியாக இருக்கும் ஒரே முன்னணி நடிகர் இவரே.

ரஜினிகாந்த் செய்த உதவிகளில் வெளியில் தெரிந்தவை மிகக் குறைவு. வலது கை கொடுப்பது இடது கைக்குத் தெரியக்கூடாது என்ற கொள்கை கொண்ட இந்த நிஜ நாயகனின் மனிதாபிமானப் பயணம் இன்றும் தொடர்ந்து கொண்டிருக்கிறது.