அண்ணன் தம்பி பாசம் எல்லாம் நடிப்போ? SK மீது பாயும் விமர்சனங்கள்!

சமீபகாலமாக தமிழ் சினிமாவில் "அடுத்த சூப்பர் ஸ்டார்" யார் என்ற போட்டிக்கு நடுவே, விஜய்யின் இடத்தைப் பிடிக்க சிவகார்த்திகேயன் முயற்சிப்பதாக ஒரு பேச்சு நிலவி வருகிறது. குறிப்பாக, விஜய்யின் அரசியல் வருகைக்குப் பிறகு, அவருடைய ரசிகர் பட்டாளத்தை தன் பக்கம் ஈர்க்க சிவகார்த்திகேயன் திட்டமிடுவதாக சமூக வலைதளங்களில் விவாதங்கள் எழுந்தன. இந்த சூழலில், பத்திரிகையாளர் அந்தணன் அளித்துள்ள சமீபத்திய பேட்டி திரையுலகில் பெரும் பரபரப்பை ஏற்படுத்தியுள்ளது.

சமீபத்தில் ஒரு நிகழ்வில் பேசிய சிவகார்த்திகேயன், தான் விஜய்யின் மேலாளர் ஜெகதீஷிடம் பேசியதாகவும், அவர் விஜய்யிடம் தகவல் தெரிவித்துவிட்டு தனக்கு வாழ்த்துக்களைக் கூறியதாகவும் குறிப்பிட்டிருந்தார். இதனைச் சுட்டிக்காட்டிய அந்தணன், "சிவகார்த்திகேயன் ஏன் விஜய்யிடம் நேரடியாகப் பேசவில்லை?" என்ற கேள்வியை முன்வைத்துள்ளார்.

விஜய்யுடன் நேரடியாகத் தொடர்பு கொள்ளும் அளவிற்கு நெருக்கம் இல்லாத உயரத்தில் சிவா இருக்கிறாரா அல்லது விஜய் அவரைத் தள்ளி வைக்கிறாரா என்ற கோணத்தில் அந்தணன் தனது விமர்சனத்தை வைத்துள்ளார். பொதுவாகத் தன்னை விஜய்யின் தீவிர ரசிகராகவும், அவரைத் தனது அண்ணனாகவும் சிவகார்த்திகேயன் பல மேடைகளில் அடையாளப்படுத்திக் கொண்டுள்ளார்.

அப்படி இருக்கும்போது, ஒரு முக்கிய விஷயத்திற்காக விஜய்யைத் தொடர்பு கொள்ள மேலாளர் ஏன் இடையில் வரவேண்டும் என்பது அந்தணனின் வாதம். சிவகார்த்திகேயன் எதையோ மறைக்கப் பார்ப்பதாகவும், இருவருக்கும் இடையே சொல்லப்படாத சில கசப்பான சம்பவங்கள் நடந்திருக்க வாய்ப்புள்ளதாகவும் அவர் சந்தேகம் எழுப்பியுள்ளார்.

வருகின்ற பொங்கல் பண்டிகையை முன்னிட்டு சிவகார்த்திகேயனின் படங்கள் வெளியாக உள்ள நிலையில், விஜய் ரசிகர்களின் கோபத்திற்கு ஆளானால் அது வசூலைப் பாதிக்கும் என்பதை உணர்ந்தே சிவா இப்படிப் பேசுகிறார் என அந்தணன் சாடியுள்ளார்.

"இந்த பூசி மெழுகும் வேலைகள் விஜய் ரசிகர்களிடம் செல்லுபடியாகாது" என்றும் அவர் எச்சரித்துள்ளார். விஜய்யின் அரசியல் பயணமும், சிவகார்த்திகேயனின் அசுர வளர்ச்சியும் இந்த மோதலுக்கு முக்கியக் காரணமாக இருக்கலாம் எனத் திரையுலக வட்டாரங்கள் கருதுகின்றன.