கடைசி நேரத்தில் ஜனநாயகன் படத்திற்கு வந்த சிக்கல்.. தயாரிப்பாளர் விளக்கம்!
விஜய்யின் கடைசி படமான ஜனநாயகன் தணிக்கை குழுவின் சிக்கலில் சிக்கியுள்ளது. உயர்நீதிமன்ற உத்தரவுக்குப் பிறகும் படம் வெளியாவதில் இழுபறி நீடிப்பது ஏன்? தயாரிப்பாளர் வெங்கட் நாராயணாவின் உருக்கமான விளக்கம்.
தமிழ் சினிமாவின் உச்ச நட்சத்திரமான தளபதி விஜய், தனது அரசியல் வருகைக்கு முன்பாக நடிக்கும் கடைசி திரைப்படம் என்பதால் ஜனநாயகன் படத்தின் மீது இந்தியா முழுவதும் மிகப்பெரிய எதிர்பார்ப்பு நிலவி வருகிறது. கே.வி.என் ப்ரொடக்ஷன்ஸ் தயாரிப்பில் உருவாகியுள்ள இப்படம், விஜய்யின் திரைப்பயணத்தில் ஒரு மைல்கல்லாக அமையும் என எதிர்பார்க்கப்பட்டது. ஆனால், படம் ரிலீஸ் ஆவதற்கு முன்பே சென்சார் போர்டு மற்றும் நீதிமன்ற வழக்குகளால் பெரும் சர்ச்சையில் சிக்கியுள்ளது.
கடந்த 2025 டிசம்பர் 18-ம் தேதியே படக்குழுவினர் படத்தை தணிக்கைக்காக சமர்ப்பித்தனர். படத்தை பார்த்த ஆய்வுக் குழு, சில காட்சிகளை நீக்கச் சொல்லி 'U/A 16+' சான்றிதழ் வழங்க ஒப்புக்கொண்டது. தயாரிப்பு தரப்பும் அந்த மாற்றங்களைச் செய்து மீண்டும் சமர்ப்பித்தனர். பொங்கல் பண்டிகையை முன்னிட்டு படம் வெளியாகும் என ரசிகர்கள் உற்சாகத்தில் இருந்த நிலையில், ஜனவரி 5-ம் தேதி ஒரு மர்மமான புகாரைக் காரணம் காட்டி, படம் திடீரென 'திருத்தக் குழுவிற்கு' (Revising Committee) மாற்றப்பட்டது.
இந்தத் திடீர் திருப்பம் படக்குழுவினரை அதிர்ச்சியில் ஆழ்த்தியது. புகார்தாரர் யார் என்பது கூடத் தெரிவிக்கப்படாத நிலையில், நேரமின்மை காரணமாக தயாரிப்பாளர் வெங்கட் நாராயணா உயர்நீதிமன்றத்தை நாடினார்.
ஜனவரி 6 மற்றும் 7 ஆகிய தேதிகளில் நடைபெற்ற விறுவிறுப்பான விசாரணையைத் தொடர்ந்து, நீதிமன்றம் படத்திற்கு சாதகமாகத் தீர்ப்பளித்தது. சென்சார் போர்டு ஏற்கனவே சொன்னபடி 'U/A 16+' சான்றிதழை வழங்க வேண்டும் என உத்தரவிட்டது. ஆனால், சென்சார் போர்டு உடனடியாக இந்தத் தீர்ப்பை எதிர்த்து மேல்முறையீடு செய்தது. இதன் விளைவாக, நீதிமன்ற உத்தரவுக்கு இடைக்காலத் தடை விதிக்கப்பட்டது. இது படத்தின் ரிலீஸ் தேதியை மீண்டும் கேள்விக்குறியாக்கியுள்ளது.
இது குறித்து கே.வி.என் ப்ரொடக்ஷன்ஸ் உரிமையாளர் வெங்கட் நாராயணா வெளியிட்டுள்ள வீடியோவில், "இந்த விவகாரம் தற்போது நீதிமன்றத்தில் இருப்பதால் எங்களால் அனைத்தையும் வெளிப்படையாகப் பேச முடியவில்லை. ஆனால், ஒரு புகாரின் அடிப்படையில் கடைசி நேரத்தில் படம் முடக்கப்பட்டது எங்களுக்கு மிகுந்த வலியைத் தருகிறது. இந்தப் படத்திற்காக பல ஆண்டுகள் உழைப்பைச் சிந்தியுள்ளோம். விஜய் அவர்களுக்கு ஒரு கௌரவமான விடைபெறுதல் (Farewell) அமைய வேண்டும் என்பதே எங்கள் விருப்பம்" எனத் தெரிவித்துள்ளார்.
