விஜய்யின் கடைசி மேடை.. சன் பிக்சர்ஸ் பேனரில் இருந்து மலேசியா பறந்த 3 இயக்குநர்கள்!

தமிழக அரசியலில் 'தமிழக வெற்றிக் கழகம்' என்ற கட்சியின் மூலம் தடம் பதித்துள்ள நடிகர் விஜய்யின் கடைசித் திரைப்படமான 'ஜனநாயகன்' வரும் பொங்கல் பண்டிகையை முன்னிட்டு திரைக்கு வரவுள்ளது. இப்படத்தின் பாடல்கள் வெளியீட்டு விழா மலேசியாவில் மிகப்பிரம்மாண்டமாக திட்டமிடப்பட்டுள்ளது. இதற்காக ஒட்டுமொத்த தென்னிந்திய திரைத்துறையே மலேசியாவில் தஞ்சம் புகுந்துள்ள நிலையில், ரசிகர்களின் எதிர்பார்ப்பு விண்ணை முட்டியுள்ளது.

விஜய்யின் அரசியல் வருகை, ஆளுங்கட்சியான திமுகவிற்கு ஒரு சவாலாகப் பார்க்கப்படும் சூழலில், இந்த விழாவிற்கு வருகை தரும் விருந்தினர்கள் குறித்த தகவல் ஆச்சரியத்தை ஏற்படுத்தியுள்ளது. குறிப்பாக, திமுக குடும்பத்தைச் சேர்ந்த கலாநிதி மாறனின் சன் பிக்சர்ஸ் நிறுவனத்தில் தற்போது முக்கிய புராஜெக்ட்களில் பணியாற்றி வரும் மூன்று முன்னணி இயக்குநர்கள் இந்த விழாவில் பங்கேற்கின்றனர்.

விஜய்க்கு தெறி, மெர்சல், பிகில் என ஹாட்ரிக் வெற்றிகளைக் கொடுத்த அட்லீ, தற்போது சன் பிக்சர்ஸ் தயாரிப்பில் அல்லு அர்ஜுன் நடிக்கும் மெகா பட்ஜெட் படத்தை இயக்க ஒப்பந்தமாகியுள்ளார்.

பீஸ்ட் படத்திற்குப் பிறகு ரஜினிகாந்தின் ஜெயிலர் மூலம் இமாலய வெற்றி கொடுத்த நெல்சன், தற்போது அதன் இரண்டாம் பாகமான 'ஜெயிலர் 2' பணிகளில் சன் பிக்சர்ஸ் உடன் இணைந்துள்ளார்.

மாஸ்டர், லியோ என விஜய்யின் ஆக்ஷன் முகத்தை மாற்றிய லோகேஷ், ரஜினியின் கூலி படத்தை முடித்துவிட்டு, அடுத்தபடியாக சன் பிக்சர்ஸ் நிறுவனத்துடனேயே தனது அடுத்த பயணத்தைத் தொடரவுள்ளார்.

சன் பிக்சர்ஸ் நிறுவனத்தின் கீழ் பிரம்மாண்ட படங்களை இயக்கி வரும் இந்த மூவரும், விஜய்யின் அரசியல் முக்கியத்துவம் வாய்ந்த 'ஜனநாயகன்' விழாவில் கலந்துகொள்வது சினிமா நட்பையும் தாண்டி ஒரு முக்கிய செய்தியைச் சொல்கிறது. அரசியலில் நேரடிப் போட்டி இருந்தாலும், திரையுலகில் விஜய்க்கு இருக்கும் செல்வாக்கை இது உறுதிப்படுத்துகிறது.

'ஜனநாயகன்' திரைப்படம் வெறும் படமாக மட்டுமில்லாமல், விஜய்யின் அரசியல் கொள்கைகளை விளக்கும் ஒரு கருவியாகவும் இருக்கும் என்பதால், இந்த ஆடியோ லாஞ்சில் அவர் பேசப்போகும் ஒவ்வொரு வார்த்தையும் தமிழக அரசியலில் புயலைக் கிளப்பும் என எதிர்பார்க்கப்படுகிறது.