பிளாக்பஸ்டர் படங்களை ஓரங்கட்டிய எதார்த்த தமிழ் சினிமா.. 2025ல் இதயங்களை வென்ற 7 படங்கள்!

வருடந்தோறும் தமிழ் திரையுலகம் பல்வேறு வகைகளில் திரைப்படங்களை வழங்கி வருகிறது. குறிப்பாக, பிரம்மாண்டமான ஆக்ஷன் மற்றும் ஃபேன்டசி படங்கள் அதிக கவனத்தை ஈர்க்கும். ஆனால், 2025 ஆம் ஆண்டில், எளிமையான, ஆனால் ஆழமான உணர்வுகளைத் தொட்டுச் சென்ற சில திரைப்படங்கள் தமிழ் ரசிகர்களின் இதயங்களை வெகுவாகக் கவர்ந்தன.

குடும்பஸ்தன்

சினிமாக்காரன் நிறுவனம் தயாரிப்பில், நக்கலைட்ஸ் யூடியூப் புகழ் ராஜேஷ்வர் காளிசாமி இயக்கியிருக்கும் திரைப்படம் 'குடும்பஸ்தன்'. இந்தப் படத்தில் மணிகண்டன், சான்வி மேக்னா, குரு சோமசுந்தரம், மற்றும் ஆர். சுந்தர்ராஜன் ஆகியோர் இணைந்து நடித்திருக்கின்றனர்.

அன்றாட வாழ்வில் நடுத்தரக் குடும்பங்கள் எதிர்கொள்ளும் சிக்கல்கள், சிறிய சண்டைகள், பெரிய கனவுகள் ஆகியவற்றை மையமாகக் கொண்டது இந்தக் கதை. இது பணத் தேவை, உறவுகளின் மனக் குழப்பங்கள் மற்றும் குடும்ப உறுப்பினர்களுக்கிடையேயான அன்பின் பிணைப்பு ஆகியவற்றை மிக எதார்த்தமான, நகைச்சுவை கலந்த நடையில் விவரித்தது.

3BHK

ஸ்ரீ கணேஷ் இயக்கிய '3BHK' படத்தில் சரத்குமார், தேவயானி, சித்தார்த், மற்றும் மேதா ரகுநாத் ஆகியோர் முக்கிய வேடங்களில் நடித்திருந்தனர். நீண்ட காலமாக ஒரு புதிய வீட்டைச் சொந்தமாக்க விரும்பும் ஒரு நடுத்தரக் குடும்பத்தின் பயணத்தைச் சுற்றியே கதை நகர்கிறது. அவர்களின் சிறுசிறு மகிழ்ச்சிகள், கனவுகள், மற்றும் எதிர்பாராத திருப்பங்கள் ஒரு அழகான குடும்ப நாடகமாக விரிகின்றன.

டூரிஸ்ட் ஃபேமிலி

இலங்கையைச் சேர்ந்த ஒரு குடும்பம் அடைக்கலம் தேடுவது பற்றிய ஒரு நெகிழ்ச்சியான தமிழ்த் திரைப்படமாக 'டூரிஸ்ட் ஃபேமிலி' பரவலாகப் பாராட்டப்பட்டது.

ஒரு போரினால் பாதிக்கப்பட்ட குடும்பம், அடைக்கலம் தேடி வேறு ஒரு நாட்டில் படும் பாடுகளையும், அவர்களுக்கு உதவும் உள்ளூர் மக்களின் மனித நேயத்தையும் மையமாகக் கொண்டது

டிஎன்ஏ

நெல்சன் வெங்கடேசனின் இயக்கத்தில், அதர்வா மற்றும் ரஜிஷா விஜயன் ஆகியோர் முக்கிய வேடங்களில் நடித்திருக்கும் இந்தப் படம், திரில்லர் வகையை ஒரு புதிய கோணத்தில் அணுகுவதற்கான சிறந்த முயற்சி என்று பேசப்பட்டது.

நிஜ வாழ்க்கை குற்றச் சம்பவத்தால் ஈர்க்கப்பட்ட இந்தக் கதை, குழந்தை கடத்தல் பற்றிய பரபரப்பான பின்னணியைக் கொண்டது. எதிர்பாராத திருப்பங்கள், உணர்ச்சிப்பூர்வமான விசாரணைகள் எனப் படம் விறுவிறுப்பாக நகர்ந்தது.

சக்தி திருமகன்

அருண் பிரபு இயக்கத்தில், விஜய் ஆண்டனி தனது 25வது படத்தில் கதாநாயகனாக நடித்ததுடன், அவரே இந்தப் படத்திற்கும் இசையமைத்திருந்தார். தொடர்ச்சியான ஏமாற்றமளிக்கும் படங்களுக்குப் பிறகு, ஒரு அரசியல் த்ரில்லர் மூலம் விஜய் ஆண்டனி ஒரு புதிய தாக்கத்தை ஏற்படுத்தினார்.

தமிழக அரசியலைச் சாடும் ஒரு துணிச்சலான கதாபாத்திரத்தில் விஜய் ஆண்டனி நடித்திருந்தார். இந்தப் படம் ரசிகர்களுக்கு ஒரு வலுவான சமூக செய்தியையும் கடத்தியது, அரசியல் சதுரங்கத்தில் நடைபெறும் சூழ்ச்சிகள் மற்றும் ஒரு சாமானியனின் எழுச்சி ஆகியவற்றை இந்தப் படம் பேசியது.

பறந்து போ

ராம் இயக்கிய 'பரந்து போ' படத்தில் சிவா, கிரேஸ் ஆண்டனி, அஞ்சலி, மற்றும் அஜு வர்கீஸ் ஆகியோர் முக்கிய வேடங்களில் நடித்திருந்தனர். யுவன் சங்கர் ராஜா இசையமைத்த இந்தப் படம், வித்தியாசமான உணர்வுப்பூர்வமான பயணமாக அமைந்தது.

தற்போதைய தலைமுறை பெற்றோர்கள் தங்கள் குழந்தைகளுக்கு ஒரு புதிய, சிறந்த வாழ்க்கையை வழங்குவதற்காக எதிர்கொள்ளும் சவால்கள் மற்றும் அவர்கள் எடுத்துக்கொள்ளும் வெவ்வேறு வாழ்க்கை முறைகளைப் பற்றிய ஒரு உணர்ச்சிப்பூர்வமான கதை.

ஆண் பாவம் பொல்லாதது

ரியோ ராஜ் மற்றும் மாளவிகா மனோஜ் ஜோடி மீண்டும் 'ஆண் பாவம் பொல்லாதது' என்ற லேசான குடும்ப நாடகத்தின் மூலம் ரசிகர்களைக் கவர்ந்தது. கலையரசன் தங்கவேல் இயக்கிய இந்தப் படம், மண வாழ்க்கை குறித்த ஒரு எளிய பார்வையை வழங்கியது.

திருமணம் ஆன சில மாதங்களுக்குப் பிறகு கணவன்-மனைவியின் வாழ்க்கை எவ்வாறு மாறுகிறது, அவர்கள் ஒருவரையொருவர் புரிந்துகொள்வது எப்படி, மற்றும் சாதாரண சூழ்நிலைகளில் எழும் நகைச்சுவை மற்றும் தவறான புரிதல்கள் பற்றிய கதை.