விஜய்க்கு மட்டும் ஏன் இப்படித் தடைகள்? ரிலீஸ் முன் சிக்கலில் சிக்கிய படங்கள்!

விஜய் இன்று தமிழ் சினிமாவின் உச்ச நட்சத்திரமாகத் திகழ்ந்தாலும், அவரது பல பிளாக்பஸ்டர் திரைப்படங்கள் தியேட்டருக்கு வரும் முன் பெரும் போராட்டங்களையே சந்தித்திருக்கின்றன. ஆரம்பக்காலத்தில் வணிக ரீதியான சவால்களை எதிர்கொண்ட விஜய், கடந்த பத்து ஆண்டுகளில் அரசியல் மற்றும் சமூக ரீதியான பல தடைகளைத் தாண்டித்தான் தனது படங்களை வெளியிட்டார்.

விஜய்யின் கேரியரில் ஒரு முக்கியமான திருப்பத்தை ஏற்படுத்திய படம் காவலன். சில தோல்விப் படங்களுக்குப் பிறகு வந்த இந்தப் படத்திற்கு தியேட்டர்கள் கிடைப்பதில் பெரும் சிக்கல் நீடித்தது. அப்போதைய அரசியல் சூழல் காரணமாக இந்தப் படம் வெளியாகக் கூடாது என்பதில் பலர் தீவிரமாக இருந்தனர். ஆனால், தடைகளைத் தாண்டி வெளியான இந்தப் படம் விஜய்க்கு ஒரு பெரிய கம்-பேக் கொடுத்தது.

இருப்பினும், விஜய்க்கு மிகப்பெரிய இடியாக அமைந்தது தலைவா படத்தின் ரிலீஸ் சிக்கல். "Time to Lead" என்ற வாசகத்திற்காக இந்தப் படத்திற்குப் பலத்த எதிர்ப்பு கிளம்பியது. வெடிகுண்டு மிரட்டல் போன்ற காரணங்களால் தமிழகத்தில் மட்டும் இப்படம் தள்ளிப்போனது. விஜய் நேரடியாக முதலமைச்சரைச் சந்திக்க முயன்றும் அனுமதி கிடைக்காத நிலையில், வீடியோ மூலம் ரசிகர்களிடம் உருக்கமாகப் பேசியது இன்றும் பலருக்கு நினைவிருக்கும்.

விஜய்யின் படங்கள் வெறும் பொழுதுபோக்கு என்பதைத் தாண்டி, சமூகக் கருத்துக்களைப் பேசத் தொடங்கியபோது சிக்கல்கள் இன்னும் அதிகரித்தன. அட்லீ இயக்கத்தில் வெளியான மெர்சல் படத்தில், ஜிஎஸ்டி (GST) மற்றும் டிஜிட்டல் இந்தியா குறித்த வசனங்களுக்கு ஆளும் தரப்பிலிருந்து கடும் எதிர்ப்பு கிளம்பியது. பாஜாக தலைவர்கள் பலரும் அந்த வசனங்களை நீக்கக் கோரினர். ஆனால், இந்த எதிர்ப்பு படத்திற்கு மிகப்பெரிய விளம்பரமாக மாறி, மெர்சல் படத்தை உலகளவில் கவனிக்க வைத்தது.

இதேபோல், ஏ.ஆர். முருகதாஸ் இயக்கத்தில் வெளியான சர்க்கார் திரைப்படம், அரசின் இலவசத் திட்டங்களை விமர்சித்ததாகக் கூறி சர்ச்சைக்குள்ளானது. அமைச்சர்கள் மற்றும் தொண்டர்கள் பல இடங்களில் பேனர்களைக் கிழித்து ஆர்ப்பாட்டத்தில் ஈடுபட்டனர். இறுதியில், படத்தின் சில காட்சிகள் நீக்கப்பட்ட பின்னரே நிலைமை சீரானது.

மற்ற படங்களுக்கு அரசியல் சிக்கல் என்றால், மாஸ்டர் திரைப்படத்திற்குப் பேரிடர் ஒரு சவாலாக அமைந்தது. கொரோனா ஊரடங்கால் தியேட்டர்கள் மூடப்பட்டிருந்த போது, ஓடிடி (OTT) தளங்கள் பல கோடி ரூபாய் சலுகைகளை வழங்கின. ஆனால், தியேட்டர் உரிமையாளர்களின் வாழ்வாதாரத்தைக் கருத்தில் கொண்டு, ஒரு வருடத்திற்கும் மேலாகக் காத்திருந்து மாஸ்டர் படத்தை திரையரங்குகளில் வெளியிட்டார் விஜய். இது தமிழ் சினிமா மீண்டும் புத்துயிர் பெற முக்கிய காரணமாக அமைந்தது.

சமீபத்தில் வெளியான லியோ திரைப்படத்திற்கு அதிகாலை காட்சிகள் (Early Morning Shows) திரையிட அனுமதி மறுக்கப்பட்டது. இது ரசிகர்களிடையே பெரும் ஏமாற்றத்தை ஏற்படுத்தியது. லோகேஷ் கனகராஜ் இயக்கத்தில் உருவான இந்தப் படம், பல்வேறு சட்டப் போராட்டங்களுக்குப் பிறகே வெளியானது. அதேபோல், வெங்கட் பிரபு இயக்கத்தில் வெளியான The Greatest of All Time (GOAT) படத்திற்கும் திரையரங்கு ஒதுக்கீடு மற்றும் சிறப்பு காட்சிகளில் சில கட்டுப்பாடுகள் இருந்தன.

விஜய்யின் ஒவ்வொரு படமும் வெளியாகும் போது ஏதாவதொரு சிக்கலைச் சந்திப்பது தற்போது வழக்கமாகிவிட்டது. விஜய் தனது 30 ஆண்டுகால திரைப்பயணத்தை முடித்துக்கொண்டு அரசியலில் முழுமையாக இறங்கப்போகும் நிலையில், அவரது கடைசிப் படமான 'ஜனநாயகன்' வெளியீட்டில் ஏற்பட்டுள்ள சிக்கல்கள் ஒட்டுமொத்தத் தமிழகத்தையும் உலுக்கியுள்ளது.

ஜனநாயகன் தணிக்கை சிக்கல்கள் மற்றும் நீதிமன்ற வழக்கு காரணமாக ஜனவரி 9 ரிலீஸிலிருந்து தள்ளிப்போயுள்ளது. புதிய ரிலீஸ் தேதி விரைவில் அறிவிக்கப்படும் எனத் தயாரிப்பு நிறுவனம் தெரிவித்துள்ளது