பாக்ஸ் ஆபீஸ் அசுரன்: தனுஷின் மார்க்கெட் மதிப்பை உயர்த்திய 5 மெகா ஹிட் திரைப்படங்கள்

நடிகர் தனுஷ், தமிழ் சினிமாவின் மிகச்சிறந்த கலைஞர்களில் ஒருவராகத் திகழ்வது மட்டுமன்றி, தற்போது இந்தியாவே வியந்து பார்க்கும் ஒரு 'பான்-இந்தியா' நட்சத்திரமாகத் தன்னை நிலைநிறுத்திக் கொண்டுள்ளார். 2024 மற்றும் 2025-ஆம் ஆண்டுகளில் வெளியான திரைப்படங்கள் அவரது மார்க்கெட் மதிப்பை அவரது திரைவாழ்வில் இல்லாத உயரத்திற்கு கொண்டு சென்றுள்ளன.தனுஷின் திரைப்பயணத்தில் அவரது மார்க்கெட் மதிப்பை அடியோடு மாற்றியமைத்த திரைப்படங்கள் மற்றும் அவரது தற்போதைய வசூல் சாதனைகளை பார்ப்போம் 

ராயன் : தனுஷின் திரை வரலாற்றில் மிகப்பெரிய வசூல் மைல்கல்:

தனுஷின் 50-வது படமான 'ராயன்', அவரது திரைப்பயணத்தில் ஒரு மிகப்பெரிய திருப்புமுனையாக அமைந்தது. அவரே இயக்கி நடித்த இந்தப் படம், தமிழ் சினிமாவில் ஒரு நடிகராகவும் இயக்குநராகவும் அவரது மார்க்கெட் அந்தஸ்தை உயர்த்தியது.'ராயன்' திரைப்படம் உலகளவில் சுமார் 157 கோடி ரூபாய்க்கும் மேல் வசூல் செய்து சாதனை படைத்தது. 100 கோடி கிளப்பில் மிக எளிதாக நுழைந்ததன் மூலம், தனுஷின் படங்களுக்கான பிசினஸ் மதிப்பு பல மடங்கு அதிகரித்தது. குறிப்பாக ஏ-சென்டர் முதல் பி மற்றும் சி சென்டர் வரை அனைத்து தரப்பு மக்களையும் இந்தப் படம் கவர்ந்தது.

குபேரா மற்றும் வாத்தி: தெலுங்கு மார்க்கெட்டில் வலுவான பிடி:

தனுஷ் வெறும் தமிழ் நடிகராக மட்டும் இருக்காமல், தெலுங்குத் திரையுலகிலும் தனது ஆதிக்கத்தைச் செலுத்தி வருகிறார். 'வாத்தி' மற்றும் சமீபத்திய 'குபேரா'  திரைப்படங்கள் இதற்கான சான்றுகள்.

குபேரா : சேகர் கம்முலா இயக்கத்தில் வெளியான இந்தப் படம், சுமார் 138 கோடி ரூபாய் வசூலித்து தனுஷின் தெலுங்கு மார்க்கெட் மதிப்பை நிலைநிறுத்தியது. நாகார்ஜுனா போன்ற முன்னணி நட்சத்திரங்களுடன் நடித்தது தனுஷிற்கு கூடுதல் பலமாக அமைந்தது.

வாத்தி : கல்வி அரசியலைப் பேசிய இந்தப் படம் தெலுங்கு மற்றும் தமிழில் ஒரே நேரத்தில் வெளியாகி 116 கோடி ரூபாய்க்கு மேல் வசூலித்தது. இது தனுஷிற்கு தெலுங்கு ரசிகர்களிடையே மிகப்பெரிய ஓப்பனிங்கை உருவாக்கித் தந்தது.

தேரே இஷ்க் மேன் : பாலிவுட்டில் ஒரு வரலாற்று சாதனை:

ஆனந்த் எல். ராய் இயக்கத்தில் 2025 இறுதியில் வெளியான 'தேரே இஷ்க் மேன்', தனுஷின் ஹிந்தி மார்க்கெட்டை உச்சத்திற்கு கொண்டு சென்றது. 'ராஞ்சனா' படத்திற்குப் பிறகு ஒரு முழுமையான காதல் கதையில் தனுஷ் நடித்தது வட இந்திய ரசிகர்களிடையே பெரும் வரவேற்பைப் பெற்றது. இந்தப் படம் வட இந்தியாவில் மட்டும் சுமார் 91 கோடி ரூபாய்க்கு மேல் வசூலித்தது. உலகளவில் 100 கோடி ரூபாய் வசூலைக் கடந்து, தனுஷின் முதல் 100 கோடி ஹிந்திப் படமாக மாறியது. இந்தப் படத்தின் மூலம், ரஜினிகாந்திற்குப் பிறகு தமிழ், தெலுங்கு மற்றும் ஹிந்தி ஆகிய மூன்று மொழிகளிலும் தனித்தனியாக 10 கோடிக்கும் அதிகமான தொடக்க வசூலை ஈட்டிய இரண்டாவது தமிழ் நடிகர் என்ற பெருமையை தனுஷ் பெற்றார்.

திருச்சிற்றம்பலம்: குடும்ப ரசிகர்களைக் கவர்ந்த 'பாக்ஸ் ஆபீஸ்' கிங்:

வெறும் ஆக்சன் மற்றும் கேங்க்ஸ்டர் படங்கள் மட்டுமல்லாமல், எளிமையான குடும்பக் கதைகளின் மூலமும் மார்க்கெட்டை உயர்த்த முடியும் என 'திருச்சிற்றம்பலம்' மூலம் தனுஷ் நிரூபித்தார். நீண்ட இடைவேளைக்குப் பிறகு தனுஷிற்கு ஒரு மிகப்பெரிய 'கம் பேக்' படமாக இது அமைந்தது. உலகளவில் 100 கோடி ரூபாய்க்கு மேல் வசூலித்த இந்தப் படம், தனுஷின் மார்க்கெட்டை அனைத்து தரப்பு வயதினரிடமும் கொண்டு சேர்த்தது.

தனுஷின் இந்த அசுர வளர்ச்சிக்கு அவரது கடின உழைப்பும், கதைகளைத் தேர்ந்தெடுக்கும் விதமுமே முக்கியக் காரணம். ஒரு சாதாரண நடிகராகத் தொடங்கி, இன்று ஹாலிவுட் வரை சென்றாலும், உள்ளூர் மார்க்கெட்டிலும் அவர் ஒரு 'பாக்ஸ் ஆபீஸ்' நாயகனாகத் திகழ்கிறார்.