கூலி படத்தில் ஏன் நடித்தேன்? நடிகர் உபேந்திரா விளக்கம்

பாக்ஸ் ஆபீஸில் சாதனை படைத்த கூலி: இயக்குநர் லோகேஷ் கனகராஜ் இயக்கத்தில், சூப்பர் ஸ்டார் ரஜினிகாந்த் நடிப்பில் உருவான 'கூலி' திரைப்படம் கடந்த ஆகஸ்ட் 14-ம் தேதி திரையரங்குகளில் வெளியானது. இந்தத் திரைப்படம் ரசிகர்களிடையே கலவையான விமர்சனங்களைப் பெற்ற போதிலும், வசூல் ரீதியாகப் பெரும் வெற்றியைப் பதிவு செய்துள்ளது. சுமார் 350 கோடி ரூபாய் பட்ஜெட்டில் பிரம்மாண்டமாகத் தயாரிக்கப்பட்ட இப்படம், உலகளவில் 600 கோடி ரூபாய்க்கும் மேல் வசூலித்து பாக்ஸ் ஆபீஸில் சாதனை படைத்துள்ளது.

நட்சத்திர பட்டாளங்களின் சங்கமம்: இப்படத்தில் ரஜினிகாந்துடன் இணைந்து தெலுங்கு நடிகர் நாகார்ஜுனா, கன்னட நடிகர் உபேந்திரா, சத்யராஜ் மற்றும் ஸ்ருதிஹாசன் எனப் பல முன்னணி நட்சத்திரங்கள் முக்கிய கதாபாத்திரங்களில் நடித்திருந்தனர். மல்டி-ஸ்டாரர் திரைப்படமாக உருவான 'கூலி', அறிவிக்கப்பட்ட நாள் முதலே திரையுலகில் பெரும் எதிர்பார்ப்பை ஏற்படுத்தியிருந்தது குறிப்பிடத்தக்கது.

ட்ரோல்களைச் சந்தித்த உபேந்திரா: படத்தில் நடித்த மற்ற நட்சத்திரங்களை விட, கன்னட திரையுலகின் டாப் நடிகரான உபேந்திரா மீது அதிக விமர்சனங்கள் வைக்கப்பட்டன. சமூக வலைதளங்களில் பலரும் அவரது கதாபாத்திரம் குறித்து ட்ரோல் செய்யத் தொடங்கினர். ஒரு மாஸ் ஹீரோவாக அறியப்படும் உபேந்திரா, இப்படத்தில் மிகச் சிறிய மற்றும் முக்கியத்துவம் இல்லாத வேடத்தில் நடித்திருந்தது ரசிகர்களுக்கு ஏமாற்றத்தை அளித்தது.

ரசிகர்களின் கேள்விக்கு உபேந்திராவின் பதில்: தனது கதாபாத்திரம் குறித்து எழுப்பப்பட்ட ட்ரோல்களுக்கு உபேந்திரா சமீபத்திய பேட்டி ஒன்றில் விளக்கம் அளித்துள்ளார். அதில், "கூலி படத்தில் நான் ஏன் சிறிய ரோலில் நடித்தேன் என்று பலரும் கேட்கிறார்கள். குறிப்பாக, நான் ரஜினியின் அடியாள் போல ஒரு காட்சியில் தோன்றியதை ரசிகர்கள் கடுமையாக விமர்சித்தனர். ஆனால், இதற்கெல்லாம் எனக்கு ஒரு தெளிவான காரணம் இருக்கிறது" என்று அவர் கூறியுள்ளார்.

ரஜினி மீதான அன்பு: "என்னை பொறுத்தவரை, ரஜினி சார் படத்தில் ஒரு சிறு காட்சியில் தோன்றுவது கூட எனக்குப் பெருமைதான். நான் ரஜினியின் தீவிர ரசிகன். அவருடன் இணைந்து ஒரே திரையில் தோன்ற வேண்டும் என்பது எனது நீண்ட கால கனவு. அதனால் தான் ரோலின் நீளத்தைப் பற்றி கவலைப்படாமல், ரஜினி சார் படத்திற்காக இதில் நடிக்கச் சம்மதித்தேன்" என உபேந்திரா தனது நெகிழ்ச்சியான காரணத்தைப் பகிர்ந்துள்ளார்.

கதாபாத்திரத்தில் ஏற்பட்ட மாற்றம்: தொடர்ந்து பேசிய அவர், ஆரம்பத்தில் படக்குழுவினர் தன்னை ஒரு சண்டைக் காட்சியில் மட்டும் நடிப்பதற்காகவே அழைத்ததாகத் தெரிவித்தார். ஆனால், அதன் பிறகு லோகேஷ் கனகராஜ் அந்த கதாபாத்திரத்தை இன்னும் சற்று விரிவுபடுத்தியுள்ளார். எதுவாக இருந்தாலும், தலைவர் படத்தில் ஒரு காட்சியில் நடிப்பது கூட தனக்கு மிகுந்த மகிழ்ச்சியையே தருகிறது எனத் தெரிவித்து ட்ரோல்களுக்கு முற்றுப்புள்ளி வைத்துள்ளார்.