புதிய வாடகைச் சட்டம் 2025: அட்வான்ஸ், வாடகைக்கு புதிய விதிகள் என்னென்ன?

இந்தியாவில் வாடகை நடைமுறையை முறைப்படுத்தவும், வீட்டு உரிமையாளர்கள் மற்றும் குடியிருப்போர் இருவரின் நலன்களையும் பாதுகாக்கவும் மத்திய அரசு அறிமுகப்படுத்திய புதிய வாடகை ஒப்பந்த விதிகள் 2025 (Rent Agreement Rules 2025) அமலுக்கு வந்துள்ளது. இதன் மூலம், வீட்டு உரிமையாளர்களின் தன்னிச்சையான வாடகை உயர்வு மற்றும் அதிக முன்பணம் வாங்குவது கட்டுப்படுத்தப்பட்டுள்ளது. முன்பணத்திற்கான வரம்பு, கட்டாய ஆன்லைன் பதிவு, திடீர் வெளியேற்றம் தடை போன்ற வாடகைதாரர்களுக்குச் சாதகமான இந்த 5 முக்கியமான விதிகள் பற்றி அனைவரும் தெரிந்து கொள்வது அவசியம்.

முன்பண வரம்பு: இனி 2 மாத வாடகை மட்டுமே (Security Deposit Cap)

புதிய வாடகை ஒப்பந்த விதிகளின்படி, குடியிருப்பாளர்களின் நிதிச் சுமையைக் குறைக்கும் வகையில் ஒரு வரலாற்றுச் சிறப்புமிக்க மாற்றம் கொண்டுவரப்பட்டுள்ளது.

• குடியிருப்பு வீடுகள் (Residential): வீட்டு உரிமையாளர்கள் அதிகபட்சமாக 2 மாத வாடகைக்கு மேல் முன்பணமாக (Security Deposit) பெற முடியாது.
• வணிக வளாகங்கள் (Commercial): வணிக ரீதியான சொத்துகளுக்கு இந்த வரம்பு 6 மாத வாடகையாக நிர்ணயிக்கப்பட்டுள்ளது.

ஒப்பந்தம் கட்டாயம் பதிவு செய்யப்பட வேண்டும் (Mandatory Registration)

இதுதான் புதிய விதிகளின் மிக முக்கியமான அம்சமாகும். இனிமேல் வாய்மொழி ஒப்பந்தம் செல்லாது.

• பதிவு: வாடகை ஒப்பந்தம் கையெழுத்தான 60 நாட்களுக்குள் வீட்டு உரிமையாளரும், குடியிருப்பாளரும் இணைந்து மாநில அரசின் இணையதளத்தில் ஆன்லைனில் டிஜிட்டல் முத்திரையிட்டு கட்டாயம் பதிவு செய்ய வேண்டும்.
• அபராதம்: அவ்வாறு பதிவு செய்யத் தவறினால், மாநில விதிகளின்படி ₹5,000 முதல் அபராதம் விதிக்கப்பட வாய்ப்புள்ளது. இதன் மூலம் வாடகை ஒப்பந்தம் சட்டப்பூர்வ ஆவணமாக மாறுகிறது.

தன்னிச்சையான வாடகை உயர்வுக்குத் தடை (Rent Hike Rules)

வீட்டு உரிமையாளர்கள் இனி நினைத்தபோதெல்லாம் வாடகையை ஏற்ற முடியாது.

• கால வரம்பு: வாடகை ஒப்பந்தம் அமலில் இருக்கும்போது, 12 மாதங்களுக்குப் பிறகு மட்டுமே வாடகை உயர்த்தப்பட முடியும்.
• நோட்டீஸ்: வாடகை உயர்வை அமல்படுத்துவதற்கு 90 நாட்களுக்கு முன்னதாகவே வீட்டு உரிமையாளர் குடியிருப்பாளருக்கு எழுத்துப்பூர்வ அறிவிப்பைக் கொடுக்க வேண்டியது கட்டாயம்.

திடீர் வெளியேற்றத்திற்குத் தடை மற்றும் தனியுரிமை (Tenant Security)

புதிய சட்டம் வாடகைதாரர்களின் தனியுரிமை மற்றும் பாதுகாப்பை உறுதி செய்கிறது.

• வெளியேற்றம்: வாடகைத் தீர்ப்பாயத்தின் (Rent Tribunal) அதிகாரப்பூர்வ உத்தரவு இல்லாமல், வாடகைதாரர்களை வலுக்கட்டாயமாகக் காலி செய்யச் சொல்ல உரிமையாளருக்கு அதிகாரம் இல்லை.
• வீட்டைச் சோதனையிடுதல்: உரிமையாளர் வீட்டைச் சோதனையிட அல்லது உள்ளே நுழைய விரும்பினால், குறைந்தது 24 மணி நேரத்திற்கு முன்பே குடியிருப்பாளருக்கு எழுத்துப்பூர்வமாக அறிவிக்க வேண்டும்.

அத்தியாவசிய சேவைகளைத் துண்டித்தால் தண்டனை (No Utility Disconnection)

• வாடகைதாரரை மிரட்ட வேண்டும் என்பதற்காக மின்சாரம், குடிநீர் போன்ற அத்தியாவசிய சேவைகளைத் துண்டிப்பது இனி சட்டப்படி தண்டனைக்குரிய குற்றமாகும்.
• பழுதுபார்ப்பு: அத்தியாவசியப் பழுதுகளை உரிமையாளர் 30 நாட்களுக்குள் சரி செய்யாவிட்டால், குடியிருப்பாளரே அதைச் சரிசெய்து, அதற்கான செலவை வாடகையில் கழித்துக் கொள்ளலாம்.