தமிழ் சினிமா மீது 4000 கோடி முதலீடு.. பிரம்மாண்டமாக வரபோகும் 5 படம், வெப் சீரீஸ்
தென்னிந்திய மொழிகளில், குறிப்பாகத் தமிழ் உள்ளடக்கங்களுக்கு உலகளவில் இருக்கும் வரவேற்பைப் பயன்படுத்திக் கொள்ளும் வகையில், JioHotstar ஒரு வரலாற்று முடிவை எடுத்துள்ளது.
தமிழக முதலமைச்சர் மு.க. ஸ்டாலின் முன்னிலையில், JioHotstar நிறுவனம், தென் இந்தியப் படைப்பாற்றல் பொருளாதாரத்தை மேம்படுத்துவதற்காக அடுத்த ஐந்து ஆண்டுகளில் 4,000 கோடி முதலீடு செய்வதற்கான "நோக்கக் கடிதத்தை (Letter of Intent)" தமிழக அரசுடன் முறையாகக் கையொப்பமிட்டுள்ளது.
இந்த முதலீடானது, தமிழ் சினிமா மற்றும் வெப் சீரிஸ் தயாரிப்பை அடுத்த கட்டத்திற்குக் கொண்டு செல்ல உதவுவதுடன், ஆயிரக்கணக்கான நேரடி மற்றும் மறைமுக வேலைவாய்ப்புகளை உருவாக்கும் என எதிர்பார்க்கப்படுகிறது.
வரவிருக்கும் பிரம்மாண்ட படைப்புகள்:
இந்த முதலீட்டு அறிவிப்பின் ஒரு பகுதியாக, JioHotstar அதன் வரவிருக்கும் பிரத்யேகத் தமிழ் திரைப்படங்கள் மற்றும் வெப் சீரிஸ்களின் பட்டியலை வெளியிட்டுள்ளது. இதில், முன்னணி நட்சத்திரங்களின் பெயர்கள் மற்றும் சுவாரஸ்யமான தலைப்புகள் இடம்பெற்றுள்ளன:
- காட்டான் - விஜய் சேதுபதி நடிக்கும் வெப் சீரீஸ்
- கெனத்த காணோம் - யோகி பாபு நடிக்கும் படம்
- லக்கி - ஜி.வி.பிரகாஷ்
- Good Wife Season 2 - ப்ரியாமணி நடிக்கும் வெப் சீரிஸ்
- LBW - விக்ராந்த்
தமிழ் சினிமாவுக்குப் புதிய பாதை!
இந்த 4,000 கோடி முதலீடானது, வெறும் உள்ளடக்கங்களை வாங்குவதற்காக மட்டுமல்லாமல், எழுத்தாளர்களுக்கான பயிற்சிப் பட்டறைகள், வழிகாட்டுதல் திட்டங்கள் (Mentorship Programs), மற்றும் உள்கட்டமைப்பு விரிவாக்கம் ஆகியவற்றிலும் செலவிடப்படும் என JioHotstar தெரிவித்துள்ளது. இதன் மூலம், தரமான தமிழ் உள்ளடக்கங்கள் உலகளாவிய பார்வையாளர்களைச் சென்றடைய ஒரு புதிய பாதை திறக்கப்பட்டுள்ளது.
நடிகர் கமல்ஹாசன், துணை முதல்வர் உதயநிதி ஸ்டாலின் உள்ளிட்டோர் கலந்துகொண்ட இந்த நிகழ்வு, தமிழ்நாட்டின் சினிமா பொருளாதாரத்திற்கு ஒரு மைல்கல்லாகப் பார்க்கப்படுகிறது.
