நெருப்பு ராணியின் ஆதிக்கம்.. அவதார் 3 விமர்சனம்!

பண்டோரா என்ற மாயாஜால உலகத்தை திரையில் உருவாக்கி, உலக சினிமாவையே வியக்க வைத்த ஜேம்ஸ் கேமரூன், தற்போது அதன் மூன்றாம் பாகமான அவதார் பயர் அண்ட் ஆஷ் மூலம் நம்மை மீண்டும் அந்த உலகிற்கு அழைத்துச் சென்றுள்ளார். இரண்டாம் பாகமான வே ஆஃப் வாட்டர் வசூலில் சாதனை படைத்தாலும், திரைக்கதையில் சற்று தொய்வு இருந்ததாக விமர்சனங்கள் எழுந்தன. அந்த குறையை இந்தப் பாகம் நிவர்த்தி செய்ததா என்று பார்ப்போம்.

படம் இரண்டாம் பாகம் முடிந்த இடத்திலிருந்தே தொடங்குகிறது. தன் மூத்த மகனை இழந்த சோகத்தில் இருக்கும் ஜேக் சல்லியின் குடும்பம், இன்னும் அந்த வலியில் இருந்து மீளவில்லை. மனிதனாக பிறந்து நாவி மக்களுடன் வாழும் 'ஸ்பைடர்', பண்டோராவின் சூழலில் சுவாசிக்க முடியாமல் திணறுகிறான்.

அவனைப் பாதுகாக்க கிரி எடுக்கும் முயற்சிகள் படத்தின் ஒரு முக்கிய திருப்பம். ஏவாவின் சக்தியைப் பயன்படுத்தி ஸ்பைடரை பண்டோராவிலேயே வாழ வைக்கும் முயற்சி ஒருபுறம் நடக்க, மறுபுறம் வில்லன் கர்னல் மைல்ஸ் குவாரிட்ச் தனது அடுத்த திட்டத்தைத் தீட்டுகிறார்.

இந்த முறை ஜேக் சல்லிக்கு சவால் விடுவது கடல் வாழ் மக்கள் அல்ல; மாறாக, நெருப்பை அடிப்படையாகக் கொண்டு வாழும் 'சாம்பல் மக்கள்' . இவர்களின் ராணி வராங், பண்டோராவின் அமைதியைக் குலைக்கத் துடிக்கிறார்.

ஸ்பைடரை வைத்து மனிதர்கள் அனைவரும் பண்டோராவில் குடியேற அவர் போடும் திட்டம், ஜேக் சல்லியை மீண்டும் ஒரு மாபெரும் போர்க்களத்திற்கு இழுத்துச் செல்கிறது.

ஜேம்ஸ் கேமரூன் படம் என்றாலே அது விஷுவல் மேஜிக் தான். இந்தப் படத்திலும் அதற்கு பஞ்சமே இல்லை. வான்வெளியில் பறக்கும் விசித்திரமான மீன்கள், சாம்பல் படர்ந்த எரிமலைப் பகுதிகள் மற்றும் நெருப்பை ஆயுதமாகப் பயன்படுத்தும் சண்டைக் காட்சிகள் என ஒவ்வொரு பிரேமும் கண்களுக்கு விருந்து வைக்கிறது. குறிப்பாக, கிரி தனது சக்தியை உணரும் காட்சிகளும், சாம்பல் பகுதி மனிதர்களிடமிருந்து தப்பிக்கும் ஸ்டண்ட் காட்சிகளும் தியேட்டரில் பார்க்க வேண்டிய ஒரு அனுபவம்.

தொழில்நுட்பத்தில் உச்சம் தொடும் கேமரூன், கதையில் மீண்டும் அதே 'பழிவாங்குதல் மற்றும் போர்' என்ற பழைய பார்முலாவையே பயன்படுத்தியிருப்பது சற்று ஏமாற்றத்தை அளிக்கிறது. ஜேக் சல்லி ஒரு படையைத் திரட்டுவதும், இறுதியில் வில்லனை எதிர்ப்பதும் முந்தைய இரண்டு பாகங்களைப் போலவே இருப்பதால், ஒரு கட்டத்திற்கு மேல் கதையில் சுவாரஸ்யம் குறைகிறது.

இந்தப் பாகத்தில் அறிமுகமாகும் ராணி வராங் கதாபாத்திரம், நாவி இனத்தவர் அனைவரும் நல்லவர்கள் அல்ல என்பதை உணர்த்துகிறது. இது அவதார் உலகிற்கு ஒரு புதிய பரிமாணத்தைத் தந்துள்ளது.

கிட் ஹாரிங்டன் மற்றும் மிச்செல் யோ இந்தப் பாகத்தில் சில புதிய ஹாலிவுட் நட்சத்திரங்கள் முக்கியப் பாத்திரங்களில் இணைந்துள்ளனர், இது படத்தின் எதிர்பார்ப்பை அதிகரித்துள்ளது. இதுவரை நீலம் மற்றும் பச்சை நிறத்தில் ஜொலித்த பண்டோராவை, முதன்முறையாக சாம்பல் மற்றும் சிவப்பு நிறத்தில் காட்டியிருப்பது புதுமையான முயற்சி.

விஷுவல் எஃபெக்ட்ஸ் மற்றும் கற்பனை உலகத்தை ரசிப்பவர்களுக்கு இந்தப் படம் ஒரு வரப்பிரசாதம். ஆனால், அழுத்தமான கதைக்களத்தை எதிர்பார்ப்பவர்களுக்கு 'பழைய மது புதிய பாட்டிலில்' என்பது போன்ற உணர்வைத் தரலாம். இருப்பினும், ஜேம்ஸ் கேமரூன் காட்டும் அந்த உலகம் நம்மைத் தியேட்டருக்கு இழுப்பதைத் தவிர்க்க முடியாது.

சினிமாபேட்டை ரேட்டிங் : 3/5