மீண்டும் அந்த திகில் நாட்கள்! லாக்டவுன் விமர்சனம்

கொரோனா என்ற ஒற்றை வார்த்தை உலகத்தையே உலுக்கிய அந்த நாட்களை யாராலும் மறக்க முடியாது. அந்த இருண்ட காலத்தை ஒரு ஆவணப் பதிவாகவும், அதே சமயம் விறுவிறுப்பான வாழ்வியல் போராட்டமாகவும் மாற்ற முயற்சி செய்திருக்கிறார் இயக்குனர் ஏ.ஆர். ஜீவா. அனுபமா பரமேஸ்வரன் முதன்மைக் கதாபாத்திரத்தில் நடித்துள்ள இப்படம், இன்று திரையரங்குகளில் வெளியாகியுள்ளது.

திரைப்படத்தின் நாயகி அனுபமா, படித்து முடித்துவிட்டு கனவுகளுடன் வேலை தேடிக்கொண்டிருக்கும் ஒரு சராசரி இளம்பெண். நண்பர்களுடனான ஒரு கொண்டாட்டமான இரவு, அவர் வாழ்க்கையையே தலைகீழாக மாற்றுகிறது. எதிர்பாராத சூழலில் அவர் கர்ப்பமடைய, அந்தச் செய்தியைச் சுமந்துகொண்டு அவர் தவிக்கும் வேளையில் தான் நாடு தழுவிய லாக்டவுன் அறிவிக்கப்படுகிறது.

மருத்துவமனைகள் அனைத்தும் கொரோனா நோயாளிகளால் நிரம்பி வழிய, வெளியே வர முடியாத சூழலில், தனது ரகசியத்தை மறைத்துக்கொண்டு அந்தப் பெண் சந்திக்கும் உளவியல் போராட்டமே படத்தின் மையக்கதை. ஒருபுறம் சமூகக் கட்டுப்பாடு, மறுபுறம் மருத்துவ உதவி கிடைக்காத ஏக்கம் என அனுபமாவின் நடிப்பு பல இடங்களில் கண்கலங்க வைக்கிறது.

இயக்குனர் ஜீவா, அனுபமாவின் கதையை மட்டும் சொல்லாமல், அந்த லாக்டவுன் காலத்தில் பாதிக்கப்பட்ட மற்ற மனிதர்களையும் கேமரா கண்களால் தொட்டுச் செல்கிறார். வருமானம் இழந்து தவிக்கும் நடுத்தர குடும்பங்கள்.

சொந்த ஊருக்குச் செல்ல வழியின்றி தவிக்கும் புலம் பெயர் தொழிலாளர்கள். வீட்டிற்குள் முடங்கிய காதலர்கள் மற்றும் முதியவர்களின் தனிமை. தங்கள் உயிரைப் பணையம் வைத்துப் போராடும் முன்களப் பணியாளர்கள் (மருத்துவர்கள்).

இப்படி பல அடுக்குகளைத் தொட்டது இயக்குனரின் சமூகப் பார்வையை காட்டுகிறது. ஆனால், இத்தனை கதைகளையும் இரண்டு மணி நேரத்திற்குள் சொல்ல முயன்றதில், சில இடங்கள் மேலோட்டமாகத் தெரிவதைத் தவிர்க்க முடியவில்லை.

அனுபமா பரமேஸ்வரன் இந்தப் படத்தின் ஒட்டுமொத்த பாரத்தையும் தன் தோளில் சுமக்கிறார். பயம், பதற்றம், தனிமை எனத் தனது நடிப்பால் மிரட்டியிருக்கிறார். இது அவர் திரைப்பயணத்தில் ஒரு முக்கியமான மைல்கல்.

லாக்டவுன் காலத்துச் சாலைகள், ஆள் நடமாட்டமற்ற தெருக்கள் என அந்தத் திகிலூட்டும் அமைதியை ஒளிப்பதிவு சிறப்பாகப் பிரதிபலிக்கிறது. தனிமையில் இருப்பவர்களின் வலியைப் பேசும் வசனங்கள் பல இடங்களில் கைதட்டல் பெறுகின்றன.

இரண்டாம் பாதியில் பல கிளைக் கதைகள் வருவதால், படத்தின் வேகம் சற்று குறைகிறது. ஒரு பெண்ணின் கருக்கலைப்பு தொடர்பான உளவியல் சிக்கலை இன்னும் ஆழமாகப் பேசியிருக்கலாம். பல விஷயங்களைத் தொட முயன்றதால், எதிலும் ஆழமாகச் செல்ல முடியவில்லை என்ற உணர்வு ஏற்படுகிறது. சில காட்சிகள் சினிமாத்தனமாக இல்லாமல், ஒரு ஆவணப்படத்தைப் பார்ப்பது போன்ற உணர்வைத் தருகின்றன.

படத்தின் இசை மற்றும் பின்னணி இசை காட்சிகளின் கனத்தை உணர்த்த உதவுகிறது. குறிப்பாக, தனிமையில் தவிக்கும் காட்சிகளில் இசை ஒரு கதாபாத்திரமாகவே மாறுகிறது. எடிட்டிங் இன்னும் சற்று கச்சிதமாக இருந்திருக்கலாம்.

லாக்டவுன் என்பது வெறும் பொழுதுபோக்குத் திரைப்படம் மட்டுமல்ல, அது நாம் கடந்து வந்த ஒரு வலிகரமான காலத்தின் சாட்சி. அனுபமா பரமேஸ்வரனின் அபாரமான நடிப்பிற்காகவும், அந்த நாட்களின் நினைவுகளுக்காகவும் இந்தப் படத்தை ஒருமுறை பார்க்கலாம்.

சினிமாபேட்டை ரேட்டிங்: 3 / 5