பா ரஞ்சித் இயக்கத்தில் ஆர்யா நடிப்பில் வெளியான சார்பட்டா பரம்பரை படத்தைப் பற்றித்தான் தமிழ் சினிமாவில் உள்ள முன்னணி நடிகர்கள் முதல் இயக்குனர்கள் வரை பலரும் பாராட்டி வருகின்றனர்.
எழுபதுகளில் வாழ்ந்த பாக்ஸிங் கலைஞர்களின் வாழ்க்கையை அப்படியே படமாக்கி உள்ளதாக ரசிகர்கள் கொண்டாடி வருகின்றனர். மேலும் சார்பட்டா படத்தில் ஆர்யாவை தவிர படத்தில் இடம்பெற்றுள்ள அனைத்து கதாபாத்திரங்களுக்கும் சரி சமமான முக்கியத்துவம் கொடுக்கப்பட்டது.
இப்படித் திரும்பிய பக்கமெல்லாம் பாராட்டையும் புகழையும் பெற்றுள்ள சார்பட்டா பரம்பரை படம் சூர்யாவின் வாழ்த்தையும் பெற தவறவில்லை. சமீபத்தில்தான் சூர்யா சார்பட்டா படத்தை பார்த்துள்ளார்.
அந்த படத்தை பார்த்து விட்டு தன்னுடைய ட்விட்டர் பக்கத்தில், சார்பட்டா பரம்பரை இதுவரை சொல்லப்படாத கதையைக் கண்முன் நிறுத்துகிறது. வடசென்னை மக்களின் வாழ்வியலை திரை அனுபவமாக மாற்ற இயக்குனரும், நடிகர்களும், ஒட்டுமொத்த படக்குழுவும் கொடுத்திருக்கும் உழைப்பு ஆச்சரியப்படவைக்கிறது. வாழ்த்துகள் என தெரிவித்துள்ளார்.
முன்னதாக பா ரஞ்சித் சார்பட்டா பரம்பரை படத்தின் கதையை நடிகர் சூர்யா மற்றும் கார்த்தி இருவரிடமும் கூறியதாகவும், இருவரும் சில காரணங்களால் அந்த படத்தை மிஸ் செய்த தாகவும் ஒரு பேட்டியில் குறிப்பிட்டிருந்தார்.
சமீபகாலமாக சூர்யா தமிழ் சினிமாவில் சிறந்த படைப்புகள் வரும்போது அதைப் பாராட்டத் தவறுவதில்லை என்பதும் குறிப்பிட வேண்டிய ஒன்று. மற்ற முன்னணி நடிகர்களைப் போல் இல்லாமல் வெளிப்படையாக சமூக வலைதளங்களில் சூர்யா பாராட்டுவது நல்ல விஷயம் என்கிறார்கள் சினிமா வட்டாரங்கள்.