பிக்பாஸ் 9 மகுடம் சூடியது இவர்தான்! கானா வினோத் பணத்தை எடுக்க, டைட்டிலை வென்றது யார்?

சின்னத்திரையின் மிகப்பெரிய ரியாலிட்டி ஷோவான பிக்பாஸ் தமிழ் சீசன் 9, விறுவிறுப்பான பல திருப்பங்களுடன் இன்று இனிதே நிறைவடைகிறது. கடந்த அக்டோபர் மாதம் 20 போட்டியாளர்களுடன் தொடங்கப்பட்ட இந்த சீசன், ஆரம்பத்தில் சற்று மந்தமாகத் தெரிந்தாலும், வைல்ட் கார்டு போட்டியாளர்களின் வருகைக்குப் பிறகு அனல் பறக்கத் தொடங்கியது. ரசிகர்களின் பெரும் எதிர்பார்ப்புக்கு மத்தியில், நேற்று நடைபெற்ற இறுதிச்சுற்றுப் படப்பிடிப்பில் திவ்யா கணேஷ் வெற்றியாளராக அறிவிக்கப்பட்டுள்ளார்.

திவ்யா கணேஷ் இந்த சீசனின் ஆரம்ப போட்டியாளர் அல்ல. ஆட்டம் பாதியில் இருக்கும்போது வைல்ட் கார்டு மூலமாக உள்ளே நுழைந்தவர். பொதுவாக வைல்ட் கார்டு போட்டியாளர்கள் இறுதிவரை செல்வதே கடினம் என்ற பிம்பத்தை உடைத்து, இன்று கோப்பையைக் கைப்பற்றியுள்ளார். பிக்பாஸ் வரலாற்றில் சீசன் 7-ல் அர்ச்சனாவுக்குப் பிறகு, வைல்ட் கார்டு போட்டியாளராக வந்து டைட்டில் வெல்லும் இரண்டாவது நபர் என்ற பெருமையை திவ்யா பெற்றுள்ளார்.

திவ்யா கணேஷின் வெற்றிக்கு முக்கியக் காரணமாகப் பார்க்கப்படுவது அவரது நேர்மையான அணுகுமுறை. 'டிக்கெட் டூ ஃபினாலே' டாஸ்க்கின் போது சக போட்டியாளரான சாண்ட்ரா இழைத்த தவறுகளைத் தைரியமாகத் தட்டிக்கேட்டது, மற்றும் கம்ருதீன் விவகாரத்தில் அவர் காட்டிய நிதானம் மக்களிடையே அவருக்குப் பெரும் ஆதரவைத் தேடித்தந்தது. குறிப்பாக, எந்தச் சூழலிலும் தனது கருத்தை வெளிப்படையாகப் பதிவு செய்ததே அவரை வெற்றியாளராக மாற்றியுள்ளது.

வெற்றிக்கு மிக அருகில் வந்து நூலிழையில் வாய்ப்பைத் தவறவிட்டவர் சபரிநாதன். ஆரம்பத்திலிருந்தே தனது தனித்துவமான விளையாட்டாலும், நகைச்சுவையான பேச்சாலும் ரசிகர்களைக் கவர்ந்த இவர், இரண்டாவது இடத்தைப் பிடித்துள்ளார். மற்றொரு வலுவான போட்டியாளரான அரோரா மூன்றாவது இடத்தையும், யூடியூப் பிரபலம் விக்கல்ஸ் விக்ரம் நான்காவது இடத்தையும் பிடித்துள்ளனர்.

இந்த சீசன் மற்ற சீசன்களை விட சற்று வித்தியாசமானது. சினிமா பிரபலங்களை விட, சமூக வலைதளங்களில் பிரபலமானவர்களுக்கு இந்த முறை அதிக முக்கியத்துவம் வழங்கப்பட்டது. இருப்பினும், சீசனை விறுவிறுப்பாக்க பிரஜின், சாண்ட்ரா, அமித் பார்கவ் மற்றும் திவ்யா கணேஷ் போன்ற அனுபவம் வாய்ந்த திரைத்துறை பிரபலங்கள் வைல்ட் கார்டு என்ட்ரியாகக் கொண்டு வரப்பட்டனர். இவர்களின் வருகை போட்டிக்கு ஒரு புதிய பரிமாணத்தைக் கொடுத்தது.

திவ்யா கணேஷ் டைட்டில் வென்ற செய்தி கசிந்ததுமே, எக்ஸ் மற்றும் இன்ஸ்டாகிராம் தளங்களில் #DivyaGanesh மற்றும் #BiggBossTamil9 போன்ற ஹேஷ்டேக்குகள் ட்ரெண்ட் ஆகத் தொடங்கியுள்ளன. "தகுதியான வெற்றியாளர்", "வைல்ட் கார்டு ராணி" என ரசிகர்கள் அவருக்குப் புகழாரம் சூட்டி வருகின்றனர். இன்று இரவு தொலைக்காட்சியில் அதிகாரப்பூர்வமாக இந்த அறிவிப்பு வெளியாகும் போது கொண்டாட்டங்கள் இன்னும் களைகட்டும் என எதிர்பார்க்கப்படுகிறது.

வெற்றி கோப்பையுடன் ரூ.50 லட்சம் பரிசுத் தொகை மற்றும் கார் போன்ற பரிசுகளையும் திவ்யா கணேஷ் தட்டிச் செல்வார் எனத் தெரிகிறது. ஒரு பெண்ணாகத் தனது போராட்ட குணத்தை வெளிப்படுத்தி மகுடம் சூடியிருக்கும் திவ்யாவுக்குப் பல்வேறு தரப்பினரும் வாழ்த்துகளைத் தெரிவித்து வருகின்றனர்.