கம்ருதீன் மோதல், மயங்கி விழுந்த சாண்ட்ரா.. நடந்தது என்ன?

பிக் பாஸ் தமிழ் சீசன் 9 இறுதிக்கட்டத்தை நெருங்கியுள்ள நிலையில், 'டிக்கெட் டூ பினாலே' (Ticket to Finale) டாஸ்க்கில் ஏற்பட்ட கடும் மோதலால் போட்டியாளர் சாண்ட்ரா மருத்துவமனையில் அனுமதிக்கப்பட்ட சம்பவம் பெரும் பரபரப்பை ஏற்படுத்தியுள்ளது.

பிக் பாஸ் வீட்டின் வெற்றியாளரை தீர்மானிக்கும் மிக முக்கியமான டிக்கெட் டூ பினாலே டாஸ்க்குகள் தற்போது நடைபெற்று வருகின்றன. இதில் வெற்றி பெறுபவர் நேரடியாக இறுதிப்போட்டிக்கு தகுதி பெறுவார் என்பதால், போட்டியாளர்களுக்கு இடையே கடும் போட்டி நிலவுகிறது.

இந்த வாரத்தின் ஒரு பகுதியாக 'கார் டாஸ்க்' வழங்கப்பட்டது. இதில் நீண்ட நேரம் காருக்குள் அமர்ந்திருக்க வேண்டும் என்ற விதியின் போது, கம்ருதீன் மற்றும் சாண்ட்ரா இடையே கடும் வாக்குவாதம் வெடித்தது.

இந்த சீசனில் அதிகம் பேசப்படும் ஜோடியாக கம்ருதீன், பார்வதி ஜோடி வலம் வருகிறது. இவர்களது உறவு குறித்து சாண்ட்ரா சில கருத்துகளை பார்வதியிடம் தனிப்பட்ட முறையில் பகிர்ந்துள்ளார். ஆனால், பார்வதி அதனை அப்படியே கம்ருதீனிடம் கூற, விஷயம் விஸ்வரூபம் எடுத்தது. சாண்ட்ராவை 'ஃபிராடு' என்று கம்ருதீன் சாட, பதிலுக்கு சாண்ட்ராவும் கடும் வார்த்தைகளால் மோதினார். இது வெறும் தனிப்பட்ட சண்டையாக ஆரம்பித்து, டாஸ்க் நேரத்திலும் தொடர்ந்தது.

கார் டாஸ்க்கின் போது கம்ருதீன் சாண்ட்ராவின் தோற்றத்தை வைத்தும், தரக்குறைவான வார்த்தைகளைப் பயன்படுத்தியும் பேசியதாகத் தெரிகிறது. இதனால் மனரீதியாகப் பாதிக்கப்பட்ட சாண்ட்ராவுக்கு திடீரென பேனிக் அட்டாக் ஏற்பட்டு, காருக்குள்ளேயே மயங்கி விழுந்தார்.

உடனடியாக பிக் பாஸ் மருத்துவக் குழுவினர் அவருக்கு முதலுதவி அளித்தனர். நிலைமை சீராகாததால், அவர் அருகிலுள்ள மருத்துவமனைக்கு அழைத்துச் செல்லப்பட்டார். தீவிர சிகிச்சைக்குப் பிறகு, தற்போது அவர் மீண்டும் பிக் பாஸ் வீட்டிற்குள் திரும்பியுள்ளார்.

இந்தச் சம்பவம் சமூக வலைதளங்களில் பெரிய விவாதத்தைக் கிளப்பியுள்ளது. சக பெண் போட்டியாளரை இழிவாகப் பேசிய கம்ருதீனுக்கு 'ரெட் கார்டு' கொடுத்து வெளியேற்ற வேண்டும் என்று சாண்ட்ராவின் ரசிகர்கள் கோரிக்கை விடுத்து வருகின்றனர். வார இறுதியில் விஜய் சேதுபதி இந்த விவகாரத்தில் என்ன மாதிரியான நடவடிக்கை எடுப்பார் என்பதே இப்போது பிக் பாஸ் ரசிகர்களின் எதிர்பார்ப்பாக உள்ளது.