தமிழக அரசு சின்னத்திரை விருதுகள் அறிவிப்பு.. முழு வெற்றியாளர் பட்டியல் இதோ!

தமிழகத்தில் வெள்ளித்திரை கலைஞர்களுக்கு இணையான வரவேற்பு சின்னத்திரை கலைஞர்களுக்கும் உண்டு. ஆனால், கடந்த சில ஆண்டுகளாக வழங்கப்படாமல் இருந்த சின்னத்திரை விருதுகள் தற்போது மொத்தமாக அறிவிக்கப்பட்டுள்ளன. 2014 முதல் 2022 வரையிலான ஒன்பது ஆண்டுகளுக்கான விருதுப் பட்டியல் வெளியாகியுள்ளது. இது சின்னத்திரை வட்டாரத்தில் பெரும் மகிழ்ச்சியையும், நெகிழ்ச்சியையும் ஏற்படுத்தியுள்ளது. ஒரு காலத்தில் இல்லத்தரசிகளின் உலகமாக இருந்த சீரியல்கள், இன்று இளைஞர்களையும் கவரும் வகையில் நவீனமடைந்துள்ள நிலையில், இந்த விருதுகள் தகுதியான கலைஞர்களைச் சென்றடைந்துள்ளன.

நடிப்புத் திறமையால் ரசிகர்களின் உள்ளங்களைக் கொள்ளை கொண்ட பல முன்னணி நடிகர்கள் இந்தப்பட்டியலில் இடம்பிடித்துள்ளனர். மூத்த நடிகர்கள் முதல் இன்றைய இளம் தலைமுறை நாயகர்கள் வரை சரிசமமாகப் பங்களித்துள்ளனர். எம்.ராஜ்குமார் மற்றும் ஆர்.பாண்டியராஜன்: யதார்த்தமான நடிப்பால் மக்களைக் கவர்ந்த இவர்களுக்கு விருது அறிவிக்கப்பட்டுள்ளது.

சஞ்சீவ் மற்றும் வ.சஞ்சீவ் சின்னத்திரையில் நீண்ட காலமாக நிலைத்து நிற்கும் சஞ்சீவ் மற்றும் வ.சஞ்சீவ் ஆகியோரது உழைப்பிற்கு அங்கீகாரம் கிடைத்துள்ளது.கார்த்திக் ராஜ் மற்றும் ஜெய் ஆகாஷ் செம்பருத்தி’ மற்றும் ‘நீதானே என் பொன்வசந்தம்’ போன்ற தொடர்கள் மூலம் இளைஞர்களின் ஃபேவரைட் நாயகர்களாக மாறிய இவர்களுக்கு விருதுகள் அறிவிக்கப்பட்டுள்ளன. மேலும் கௌசிக், கிருஷ்ணா மற்றும் குணச்சித்திர நடிப்பில் முத்திரை பதிக்கும் தலைவாசல் விஜய் ஆகியோரும் இந்தப் பட்டியலில் கௌரவிக்கப்பட்டுள்ளனர்.

பெண்களை மையமாக வைத்து நகரும் சீரியல்களில், தங்கள் நடிப்பால் அந்தப் பாத்திரங்களுக்கு உயிர் கொடுத்த நடிகைகள் கௌரவிக்கப்பட்டுள்ளனர். ராதிகா சரத்குமார் சின்னத்திரையின் ராணி என அழைக்கப்படும் ராதிகா, தனது அபாரமான நடிப்பிற்காக விருது பெற்றுள்ளார்.

‘தெய்வமகள்’ சத்யா மூலம் பட்டிதொட்டியெங்கும் பிரபலமான வாணி போஜன் மற்றும் வில்லி, நாயகி என இரண்டு பரிமாணங்களிலும் கலக்கும் நீலிமாராணி ஆகியோருக்கு விருது கிடைத்துள்ளது. இன்றைய ட்ரெண்டிங் நடிகைகளான சைத்ரா ரெட்டி (யாரடி நீ மோகினி) மற்றும் சபானா (செம்பருத்தி) ஆகியோர் விருதுப் பட்டியலில் இடம்பெற்று ரசிகர்களை உற்சாகப்படுத்தியுள்ளனர். இவர்களுடன் சங்கவி, ரேவதி, ரேஷ்மா மற்றும் கேப்ரியல்லா செல்லஸ் ஆகியோரும் சிறந்த நடிகைகளாகத் தேர்வு செய்யப்பட்டுள்ளனர்.

சீரியல்கள் என்பது வெறும் பொழுதுபோக்கு மட்டுமல்ல, அவை பல குடும்பங்களின் வாழ்வியலோடு கலந்தவை. அந்த வகையில் 2014 முதல் 2022 வரை மக்களைக் கட்டிப்போட்ட தொடர்கள்.

ஆரம்ப கால வெற்றித் தொடர்கள் 'அழகி' மற்றும் வரலாற்றுப் பின்னணி கொண்ட 'ரோமாபுரி பாண்டியன்' மற்றும் 'ராமானுஜர்' ஆகிய தொடர்கள் சிறந்த சீரியல்களாகத் தேர்வு செய்யப்பட்டுள்ளன. சன் டிவியின் 'நந்தினி' மற்றும் ஜீ தமிழின் 'பூவே பூச்சூடவா', 'செம்பருத்தி' போன்ற பிரம்மாண்டத் தொடர்கள் விருதுகளைத் தட்டிச் சென்றுள்ளன.

ரசிகர்களின் பேராதரவைப் பெற்ற 'ராசாத்தி', 'சுந்தரி' மற்றும் பெண்களின் முன்னேற்றத்தைப் பேசிய 'எதிர்நீச்சல்' ஆகிய தொடர்கள் இந்த உயரிய விருதைப் பெற்றுள்ளன. குறிப்பாக 'எதிர்நீச்சல்' தொடருக்குக் கிடைத்துள்ள அங்கீகாரம் இத்தொடரில் ஆதி குணசேகரன் ஆக நடித்த மாரிமுத்துவுக்கு  கிடைத்த மிகப்பெரிய மரியாதையாகக் கருதப்படுகிறது.

இந்த விருதுகள் அறிவிக்கப்பட்டதோடு மட்டுமல்லாமல், விரைவில் இதற்கான பிரம்மாண்டமான விழா நடைபெறவுள்ளது. தங்களது பல ஆண்டுகால உழைப்புக்குக் கிடைத்த வெற்றியாக கலைஞர்கள் இதனைப் பார்க்கிறார்கள். சமூக வலைதளங்களில் சைத்ரா ரெட்டி, சபானா போன்ற நடிகைகளுக்கு ரசிகர்கள் வாழ்த்துகளைக் குவித்து வருகின்றனர். தமிழக அரசின் இந்த நடவடிக்கை சின்னத்திரை துறையினருக்குப் புதிய புத்துணர்ச்சியை அளித்துள்ளது என்பதில் ஐயமில்லை.