மனித மனதிற்குள் புதைந்து கிடக்கும் ஆழமான ஏக்கங்களையும், வெளிப்படுத்தாத ஆசைகளையும் மையமாக வைத்து ஒரு அழகான ஃபீல்-குட் திரைப்படத்தை இயக்கியுள்ளார் வர்ஷா வாசுதேவ். பாபுஜி புரொடக்ஷன்ஸ் நிறுவனத்தின் கீழ் அபிஜித் பாபுஜி தயாரித்துள்ள இத்திரைப்படம், வரும் ஜூன் 19 ஆம் தேதி ஏஜிஎஸ் சினிமாஸ் விநியோகத்தின் மூலம் தமிழகம் முழுவதும் பிரம்மாண்டமாகத் திரைக்கு வருகிறது.
புனித நகரமான காசியின் பின்னணியில், எதிர்பாராத சூழலில் இணையும் ஒரு ஆண் மற்றும் பெண்ணின் உணர்வுப்பூர்வமான பயணமே இப்படத்தின் முக்கியக் கதைக்களமாகும். இதில் முதன்முறையாக முற்றிலும் மாறுபட்ட கதாபாத்திரங்களில் பிரபல மலையாள நடிகர் இந்திரன்ஸ் மற்றும் மூத்த நடிகை மதுபாலா இணைந்து நடித்துள்ளனர். இவர்களுடன் அபர்ணா பாலமுரளி, தம்பி ராமையா, காளி வெங்கட், ஜாபர் சாதிக், விஷ்ணு அகஸ்தியா மற்றும் சாய் ஜனனி ஆகியோர் முக்கியப் பாத்திரங்களில் தங்களின் பங்களிப்பை வழங்கியுள்ளனர்.
தொழில்நுட்பக் கலைஞர்கள்
இசை: ’96’ படத்தின் மூலம் கவனம் ஈர்த்த கோவிந்த் வசந்தா, இப்படத்திற்காக மனதைத் தொடும் 6 பாடல்களுக்கு மெட்டமைத்துள்ளார். (ஆடியோ உரிமையை ‘திங்க் மியூசிக்’ நிறுவனம் பெற்றுள்ளது).
- ஒளிப்பதிவு: ஃபைஸ் சித்திக்
- படத்தொகுப்பு: ரெக்சன் ஜோசப்
- கலை இயக்கம்: சாபு மோகன்
- ஒலி வடிவமைப்பு: ரெங்கநாத் ரவி
தென்னிந்தியாவின் முக்கிய நான்கு மொழிகளில் (தமிழ், தெலுங்கு, மலையாளம், கன்னடம்) பான்-இண்டியா படமாக உருவாகியுள்ள இத்திரைப்படம், தணிக்கைக் குழுவிடம் இருந்து எவ்வித வெட்டுக்களுமின்றி ‘U’ சான்றிதழ் பெற்றுள்ளது.
இதுகுறித்து படக்குழுவினர் பேசுகையில்,
“ஒவ்வொரு மனிதருக்குள்ளும் இருக்கும் சிறுசிறு ஆசைகளையும், அவற்றின் பின்னால் இருக்கும் எதார்த்தமான எமோஷன்களையும் அதன் ஆன்மா கெடாமல் திரையில் கொண்டு வந்துள்ளோம். நிச்சயம் இந்தத் திரைக்கதையும், நடிகர்களின் எதார்த்தமான நடிப்பும் ரசிகர்களின் இதயங்களை நெகிழ வைக்கும்,” என்று நம்பிக்கை தெரிவித்துள்ளனர்.
