கோலிவுட்டில் தனது தனித்துவமான நடிப்பாலும்,கடின உழைப்பாலும் தனக்கென ஒரு தனி இடத்தைப் பிடித்திருப்பவர் நடிகர் தனுஷ்.சாதாரண நடிகராகத் தொடங்கி,இன்று இந்திய அளவில் கவனம் ஈர்க்கும் கலைஞராக வளர்ந்திருக்கும் இவருக்குத் தொடர்ந்து பல்வேறு அங்கீகாரங்கள் கிடைத்து வருகின்றன.அந்த வகையில் தற்போது கிடைத்துள்ள மற்றொரு முக்கியமான விருது ரசிகர்கள் மத்தியில் மகிழ்ச்சியை ஏற்படுத்தியுள்ளது.
சிஎன்என்-நியூஸ்18 சார்பில் நடைபெற்ற ‘இந்தியன் ஆஃப் தி இயர் 2026’விருது விழாவில்,மக்கள் தேர்வு விருதை நடிகர் தனுஷ் வென்றுள்ளார். இந்த விருதைப் பெற்றுக்கொண்ட அவர்,தனது மகிழ்ச்சியையும் சினிமா பயணத்தின் தொடக்கத்தில் தனக்கு இருந்த ஆசையையும் பகிர்ந்துகொண்டார்.
அப்போது பேசிய தனுஷ்,ஆரம்பத்தில் தனக்கு செஃப் ஆக வேண்டும் என்பதுதான் ஆசையாக இருந்ததாகவும், எதிர்பாராத விதமாக நடிகராக மாறியதாகவும் தெரிவித்தார்.இன்று இந்த அளவிற்கு உயர்ந்திருப்பதற்கு தனது பெற்றோர்,ரசிகர்கள் மற்றும் இறைவனின் அருளே முக்கியக் காரணம் என்றும் நெகிழ்ச்சியுடன் குறிப்பிட்டார்.
மேலும்,இந்த விருதைப் பெற்றிருப்பது தனக்கு மிகுந்த மகிழ்ச்சியை அளிப்பதாகவும் தெரிவித்தார்.
தனுஷின் இந்த வெற்றிக்கு ரசிகர்கள் பலரும் சமூக வலைதளங்களில் வாழ்த்துகளைத் தெரிவித்து வருகின்றனர்.அவரது உழைப்புக்கும் திறமைக்கும் கிடைத்த மற்றொரு அங்கீகாரமாகவே இந்த விருது பார்க்கப்படுகிறது.




