சிவகார்த்திகேயன் நடிக்கும் ‘சேயோன்’ படத்தை கமல்ஹாசனின் ராஜ்கமல் பிலிம்ஸ் நிறுவனம் தயாரிக்கிறது. இப்படத்தின் கிளைமாக்ஸில் கமல்ஹாசன் சிறப்புத் தோற்றத்தில் நடிக்கவுள்ளதாகத் தகவல்கள் வெளியாகி வருகின்றன.
குறிப்பாக, 2004-ல் வெளியான ‘விருமாண்டி’ படத்தில் இடம்பெற்ற அதே கெட்டப்பில் அவர் நடிக்க இருப்பதாகச் சமூக வலைதளங்களில் செய்திகள் பரவி வருகின்றன.
ஏற்கனவே சிவகார்த்திகேயன் தயாரிப்பில் வெளியான ‘தாய் கிழவி’ படத்தை இயக்கிய சிவக்குமார் முருகேசன்தான் ‘சேயோன்’ படத்தையும் இயக்குகிறார்.
மேலும், ‘தாய் கிழவி’ படத்தில் நடிகர் சிங்கம்புலி ஏற்றிருந்த கதாபாத்திரமும் ரசிகர்களிடையே கவனம் பெற்றது. கமல்ஹாசனின் தீவிர ரசிகரான சிங்கம்புலி, அந்தப் படத்தில் கமல் ரசிகராகவே நடித்திருந்தார். குறிப்பாக, கமல்ஹாசனுக்காகப் பிரத்யேகமாகத் திரையிடப்பட்ட இப்படத்தைப் பார்த்த பிறகு, சிங்கம்புலியின் நடிப்பை அவர் வெகுவாகப் பாராட்டியிருந்தார்.
அதேபோல், படத்தைப் பார்த்து முடித்த கையோடு அறிமுக இயக்குநர் சிவக்குமார் முருகேசனைக் கட்டியணைத்த கமல்ஹாசன், “என்னை விடவும் இந்தப் படத்தைப் பற்றி பார்வையாளர்கள்தான் அதிகம் பேசுவார்கள்” என்று நம்பிக்கையுடன் தெரிவித்திருந்தார்.
இந்நிலையில், ‘விருமாண்டி’ படத்தின் அதே தோற்றத்தில் கமல்ஹாசன் ‘சேயோன்’ படத்தில் வந்தால், அது ரசிகர்களுக்கு மிகப்பெரிய சர்ப்ரைஸாக இருக்கும் என்பதில் சந்தேகமில்லை.
குறிப்பாக, ‘விருமாண்டி’ படத்தின் காட்சிகள் மற்றும் பாடல்கள் தற்போது இன்ஸ்டாகிராம் ரீல்ஸ்களில் அதிக அளவில் பயன்படுத்தப்பட்டு வருகின்றன. இதனால், அந்தப் படத்தைப் பார்க்காத 2K கிட்ஸ் ரசிகர்களிடமும் விருமாண்டி கெட்டப் மீதான ஆர்வம் அதிகரித்துள்ளது.




