சினிமா செல்வாக்கு வாக்குகளாக மாறுமா? தமிழக அரசியலை அதிரவைத்த திரை நட்சத்திரங்கள்!

தமிழக அரசியலில் ‘சினிமா டூ சிஎம்’ என்ற பாதையை முதலில் எம்.ஜி.ராமச்சந்திரன். விஜய்க்கு இருக்கும் கூட்டத்தைப் போலவே, அன்று எம்.ஜி.ஆருக்காகத் திரண்ட மக்கள் கூட்டம் மலைக்கத்தக்கது. திமுக-வில் இருந்து பிரிந்து அதிமுக-வைத் தொடங்கி, அடுத்த 10 ஆண்டுகளில் முதல்வரானார். ஏழை எளிய மக்களுக்கான மதிய உணவுத் திட்டம் போன்ற திட்டங்கள் மூலம் மக்களின் நிரந்தர அன்பைப் பெற்றார்.

சினிமாவில் ஈடுஇணையற்ற நடிகராக விளங்கிய சிவாஜி கணேசன், அரசியலிலும் தடம் பதித்தார். தொடக்கத்தில் திராவிட இயக்கங்களுடன் பயணித்த அவர், பின்னர் காங்கிரஸ் கட்சியில் இணைந்தார். பிறகு ‘தமிழக முன்னேற்ற முன்னணி’ என்ற தனிக்கட்சியைத் தொடங்கினார். சினிமாவில் பெரும் கூட்டம் இவருக்கு இருந்தாலும், அது தேர்தல் வாக்குகளாக முழுமையாக மாறவில்லை.

விஜய்க்கு முன்னால், சினிமா செல்வாக்கை மிகக் குறுகிய காலத்தில் அரசியல் வெற்றியாக மாற்றியவர் விஜயகாந்த். 2005-ல் ‘தேமுதிக’ கட்சியைத் தொடங்கியபோது, மதுரையில் திரண்ட பிரம்மாண்ட கூட்டம் தமிழக அரசியல் களத்தையே அதிர வைத்தது. தனித்து நின்று போட்டியிட்டு 10% வாக்கு வங்கியைப் பெற்று, பின்னர் தமிழகத்தின் எதிர்க்கட்சித் தலைவர் என்ற அந்தஸ்தை எட்டிப் பிடித்தார்.

தன்னுடைய கலைத் திறமையால் உலகப் புகழ்பெற்ற கமல்ஹாசன், ‘மக்கள் நீதி மய்யம்’ என்ற கட்சியைத் தொடங்கி அரசியலில் நுழைந்தார். நகர்ப்புற இளைஞர்கள் மற்றும் படித்த மக்களிடையே இவருக்குப் பெரும் ஆதரவு கிடைத்தது. திராவிடக் கட்சிகளுக்கு மாற்றாக ஒரு மாற்று அரசியலை முன்வைத்து, தற்போதும் அரசியல் களத்தில் தீவிரமாகச் செயல்பட்டு வருகிறார்.

நடிகர் மற்றும் இயக்குநராக இருந்த சீமான், ‘நாம் தமிழர்’ கட்சி மூலம் இளைஞர்களிடையே பெரும் தாக்கத்தை ஏற்படுத்தியுள்ளார். தேர்தல் அரசியலில் ஒரு நடிகராகப் பார்க்கப்படாமல், ஒரு தீவிர அரசியல் தலைவராக உருவெடுத்துள்ளார். இவரைப் போலவே சரத்குமார், கார்த்திக் போன்ற பல நடிகர்களும் கட்சிகளைத் தொடங்கி அரசியலில் தங்களை ஈடுபடுத்திக் கொண்டனர்.

தற்போது ‘தமிழக வெற்றி கழகம்’ என்ற கட்சியின் மூலம் விஜய் அரசியலில் அடியெடுத்து வைத்துள்ளார். இவருடைய மாநாடுகளில் திரளும் லட்சக்கணக்கான இளைஞர்கள் மற்றும் பெண்கள், எம்.ஜி.ஆர் மற்றும் விஜயகாந்த் காலத்து எழுச்சியை நினைவூட்டுகின்றன. பழைய நடிகர்களின் அரசியல் அனுபவங்களையும், தற்போதைய தொழில்நுட்ப வளர்ச்சியையும் கொண்டு விஜய் எத்தகைய மாற்றத்தை ஏற்படுத்துவார் என்பதே அனைவரின் எதிர்பார்ப்பாகும்.