தமிழ் சினிமாவில் புகழ்பெற்ற கதாபாத்திரங்களில் அம்மா கதாபாத்திரத்திற்கு எப்போதுமே தனி இடமும் முக்கியத்துவமும் உண்டு. பல படங்களின் கதைக்கு ஆணிவேராக இருப்பதே அம்மா கதாபாத்திரம்தான். பெரும்பாலும் உணர்ச்சிப்பூர்வமாகச் சித்தரிக்கப்படும் இந்தக் கதாபாத்திரங்கள், பார்வையாளர்களின் மனதைத் தொடுவதில் மிகப்பெரிய பங்கு வகிக்கின்றன.
தொடக்கக் காலத் தமிழ் சினிமாவில் அம்மாக்கள் சோகமாகவே சித்தரிக்கப்பட்டனர். ஆனால், காலப்போக்கில் அந்தப் பிம்பம் மாறி, இன்று அம்மாக்கள் தோழியாகவும், மகனின் நண்பராகவும் வலம் வருகிறார்கள். அதேபோல், ஒரு ஹீரோவை நல்ல மகனாகக் காட்டும் கதைகளுக்கும் ரசிகர்கள் மத்தியில் எப்போதுமே தனி வரவேற்பு உண்டு.
அவ்வாறு, தமிழ் சினிமாவில் அம்மா என்றாலே நம் நினைவுக்கு வரும் வகையில், தங்களுடைய இயல்பான நடிப்பால் முத்திரை பதித்த நடிகைகள் பலர் இருக்கிறார்கள்.
கண்ணாம்பா, பண்டரிபாய், மனோரமா, ஸ்ரீவித்யா, லட்சுமி, சுஜாதா, சரண்யா பொன்வண்ணன், ரேவதி, ஊர்வசி, கீதா கைலாசம் எனப் பலரும் அம்மா கதாபாத்திரங்களில் தங்களுடைய தனித்துவமான நடிப்பால் ரசிகர்களைக் கவர்ந்துள்ளனர்.
இனி வரும் காலங்களில் அம்மா கதாபாத்திரங்கள் வெறும் துணைக் கதாபாத்திரங்களாக மட்டுமே இல்லாமல், கதையின் மையமாகவும் உருவெடுக்கும்.
அதேபோல், அம்மா என்றாலே தவறே செய்யாதவர், தியாகத்தின் உருவம் என்ற வழக்கமான பிம்பங்களும் உடைக்கப்பட்டு தனக்கான ஆசைகள், கனவுகள், விருப்பங்கள் எனத் தனி வாழ்க்கையைக் கொண்ட ஒரு பெண்ணாகவும், கதையை முன்னெடுத்துச் செல்லும் வலிமையான கதாபாத்திரமாகவும் அம்மாக்கள் திரையில் சித்தரிக்கப்படுமென்றே தோன்றுகிறது.
