மலையாளத்தில் பிரபல நடிகர் நிவின் பாலி நடிப்பில் வெளியான பிரேமம் படத்தில் நடித்ததன் மூலம் பிரபலமானவர் நடிகை சாய் பல்லவி. தமிழ் நடிகையான இவர் தற்போது மலையாளம் மற்றும் தெலுங்கு சினிமாவில் முன்னணி நடிகையாக வலம் வந்து கொண்டிருக்கிறார். இவருக்கு தமிழ் மட்டுமல்லாமல் அனைத்து தென்னிந்திய மொழிகளிலும் ஏராளமான ரசிகர்கள் உள்ளனர்.
பிரேமம் படத்தை தொடர்ந்து சாய்பல்லவி என்ன செய்தாலும் அது ரசிகர்கள் மத்தியில் வைரலாகி வருகிறது. அந்த வகையில் தெலுங்கு படத்திற்காக அவர் ஆடிய பாடல் ஒன்று இணையதளத்தில் டிரெண்டிங்கில் ஹிட் அடித்து வருகிறது.
தமிழ்ப் பெண்ணாக இருந்தாலும் தமிழ் சினிமா இவருக்கு பெரியளவில் கைக்கொடுக்கவில்லை. மலையாளத்தை தொடர்ந்து தெலுங்கில் ஃபிதா என்ற படத்தில் நடித்தார். அப்படம் சாய்பல்லவியின் முகவரியையே மாற்றிவிட்டது.
தற்போது தெலுங்கில் முன்னணி நாயகியாக இருக்கும் அவர், விராட்ட பருவம், லவ் ஸ்டோரி, ஷ்யாம் சிங்கா ராய் உள்ளிட்ட படங்களில் நடித்துள்ளார். இதில் விராட்ட பருவம், லவ் ஸ்டோரி ஆகிய படங்கள் அடுத்தடுத்து வெளிவரவுள்ளன. இப்படங்களுக்கு ரசிகர்களிடையே மிகப்பெரிய எதிர்பார்ப்பு உள்ளது.
தற்போது லவ் ஸ்டோரி படத்தில் இடம்பெற்றுள்ள சாரங்க தரியா பாடல் புதிய சாதனை ஒன்றை படைத்துள்ளது. முன்னதாக லிரிக்கல் வீடியோவாக வெளியிடப்பட்ட போதே டிரெண்டிங்கில் இருந்து வரும் இப்பாடல், மேலும் புதிய சாதனையை படைத்துள்ளது.
அதன்படி இதுவரை 300 மில்லியன் பேர் இப்பாடலை பார்த்துள்ளனர். சாய்பல்லவி எப்போது எதை செய்தாலும் ஹிட் தான். அதனால் சாரங்க தரியா பாடலின் ஹிட்டும் அவரையே சேரும் என ரசிகர்கள் புகழாரம் சூட்டியுள்ளனர். இதுமட்டுமின்றி முன்னதாக தனுசுடன் மாரி 2 படத்தில் சாய்பல்லவி இணைந்து ஆடிய ரவுடி பேபி பாடல் இணையத்தில் புதிய சாதனை படைத்துள்ளது குறிப்பிடத்தக்கது.
