தமிழ் சினிமாவின் இளம் ஹீரோக்களில் ஒருவராக, நடிகர் அதர்வாவுக்கு ஒரு தனித்துவமான ரசிகர் வட்டம் உருவாகியுள்ளது. ‘ஈட்டி’, ‘ஜெமினி கணேசனும் சுருளிராஜனும்’ போன்ற வணிகரீதியான படங்களில் நடித்து வரவேற்பை பெற்றுள்ள அவர் ‘பரதேசி’ போன்று கலைநிலையிலும் மதிப்பெண்கள் பெற்ற படங்களில் தனது நடிப்புத் திறமையை வெளிப்படுத்தி பாராட்டுகளை பெற்றுள்ளார்.
அந்தக் கோணத்தில் பார்க்கும்போது, நெல்சன் வெங்கடேசன் இயக்கத்தில் அதர்வா நடிப்பில் உருவாகியுள்ள ‘டி.என்.ஏ’ திரைப்படம், ஜூன் 20-ஆம் தேதி திரையரங்குகளில் வெளியாக உள்ளது.
இந்த படத்தின் பிரமோஷன் வேலைகளின் ஒரு பகுதியாக, கலட்டா தமிழ் யூட்யூப் சேனலுக்கு நடிகர் அதர்வா நேர்காணல் வழங்கினார். அந்த நேர்காணலில், முதல் முறையாக தனது தந்தையும், நடிகருமான முரளியைப் பற்றிய பல்வேறு நினைவுகளையும், அனுபவங்களையும் அவர் திறந்த மனதுடன் பகிர்ந்தார்.
அதர்வாவின் வாழ்க்கை போராட்டமும் திரையுலக பயணமும்
எனது முதல் திரைப்படம் வெளியான சில நாட்களிலேயே என் தந்தை இறந்துவிட்டார். அப்போது, அடுத்தடுத்து என்ன செய்வது என்ற தெளிவே இல்லை. ஏனெனில், வாழ்க்கையில் எதையும் முடிவு செய்யும்போது என் அப்பாவிடம் ஆலோசனை கேட்பதுதான் எனக்கு வழக்கமாக இருந்தது.
அந்த நேரத்தில் நான் மட்டுமல்ல, என் குடும்பத்தினரும்தான் பலமாக பாதிக்கப்பட்டோம். அப்போது தான் வாழ்க்கை என்பது நிச்சயமற்றது என்பதை உணர்ந்தேன்.
ஒரு குறிக்கோளை வைத்துக்கொண்டு அந்த நோக்கத்தை நோக்கி பயணிப்பது அவசியம். அதே நேரத்தில், நம்மைச் சுற்றியுள்ள வாழ்க்கையையும் மறந்து விடாமல் அதை உணர்ந்தபடியே வாழ தெரிந்துகொள்ள வேண்டும்.
அதனால்தான், இன்று வரை நான் மற்றவர்களுக்கு எந்தத் தீங்கும் இல்லாமல், மகிழ்ச்சியாக வாழ வேண்டும் என்ற எண்ணத்தோடு வாழ்கிறேன். திரையுலகிற்கு வந்தபோது, ஒரு ஹீரோவாக வரவேற்பு பெறும் சந்தர்ப்பம் எனக்கு கிடைக்கவில்லை.
காரணம் அப்போது என் வாழ்க்கையிலேயே பல மாற்றங்கள், சிக்கல்கள் நடந்துகொண்டிருந்தது. அந்த நிலைமைகள், எனக்கே என் வாழ்க்கையைத் தவிர மற்ற எதையும் யோசிக்க இடம் கொடுக்கவில்லை என்று நடிகர் அதர்வா தெரிவித்துள்ளார்.
